[2001-08-19] 娛記走場：曾志偉的「教仔經」

　新聞人物曾志偉對自己今次的「大三疤經歷」很無奈，不過也意外地令他和家人的感情變得密切，一向親媽媽的仔女愈來愈親近爸爸，相信不會再被老友阿倫「瘀」他每次見個仔都說：「嘩！原來已經咁高呀？」一向搞笑的他擅長同後生仔溝通，同自己仔女又點呢？搞唔搞得掂？有否教壞仔女？

　「OK啦！年輕人最怕同『老鬼』傾偈，保持童心未泯才可融入他們圈子，交談不要老氣橫秋，點解他們折服於教授，因為教授叻過他們，你都要有令他服你的東西。」這倒是很中肯的分析。

　志偉又有感而發說：「現時的年輕人不識做人，人際關係很差，不懂尊重長輩，書讀得多，講道理卻講不清，表達能力弱，又無主見、無計劃，一旦朋友不打電話來好像沒有指示，失去方向，這天就不知做甚麼才好。無電話、無信用卡不識生活，個個畢業後仍要父母扶持生活，問父母做甚麼工作好，真替他們擔心！」

　其實論學識上一代人一定不及下一代，可以幫仔女的不多，他謂只可以將自己經驗告訴仔女，希望仔女不要好高騖遠，可以腳踏實地，一步步紮實地爬上目標，不要因為一份工得七千元人工，同阿媽畀的零用差不多，所以不做！只要合自己做，七千酬金也肯捱，這樣終有一天你有機會賺七萬，他都是這樣捱出來的。

　志偉也強調成功與好的人際關係息息相關，他同阿叻、阿倫既可共患難也可共富貴，除了臭味相投外是做人豁達，就算朋友令你激氣也不要記住，諒解佢，利益分配也不要計較誰多誰少，有是非出現，你一定要信任朋友，堅信他不會咁做，友誼便不會受損，身邊有班好朋友支持你，做事自然是成功！

　平日搞搞震的志偉呢番教仔理論和方法不知各位阿爸阿媽合不合用了？

•小 新•