[2004-08-29] 精彩對話：曾：民主黨發言最叻欠實踐
涂謹申：董生(董建華)過往的失誤，你(民建聯)都要承擔責任。
曾鈺成：所有失誤的政策就歸咎於民建聯，所有政府做得好的，就歸功於反對派，明智的選民，呢個講法你會唔會信？
涂謹申：咁你認為董建華政府過往失誤的政策，你係唔需要負上責任，只是反對派需要承擔責任？
曾鈺成：反對派唔懂得講建設性的建議，民建聯建設性的建議就非常之多，而好多亦成為政府的政策。
北上創業利弊爭拗
梁雪芳：點解民建聯會如此大力推動中小企北上創業？你哋是否想過內地的法例、配套設施是否適合香港人？據我所知，由80年代後期開始上去(內地)的中小企，個個都「焦頭爛額」。
曾鈺成：1號的朋友可以放心，香港做生意的人比你們精明得多，若他們返內地真是「焦頭爛額」的話，他們就唔會再返上去。點樣宣傳、賣廣告都係無用。
涂謹申：特區政府在協助CEPA、市民北上尋找商機方面做得唔多，你作為行政會議成員，照計你會推動政府去做，唔係津貼他們，而係提供資料等，但現在只係民建聯去做，你唔覺得好奇怪嗎？
政府團體各有功能
曾鈺成：政府有政府的功能，作為一個民間的團體，一個政治團體，應該有政治團體的功能，如果乜嘢都可以由政府做晒，要凉議員做乜嘢？要凉政黨做乜嘢？點解要開咁多辦事處？
涂謹申：但係政府的資源點都比你多，唔通你們的資源比政府多？
曾鈺成：大家工作的方式唔同，政府用的錢，首先要等你哋民主黨同意才可以用，但民建聯不需要，只要民建聯覺得對香港市民有利，我哋就會做。我哋唔需要咁多關卡。
「發言鞭策」與實幹
涂謹申：你唔係暗示我哋會反對呢方面？我哋一向大力支持CEPA的資訊系統……我哋發言時會鞭策政府……
曾鈺成：你哋講得𠎀，會發言鞭策，民主黨最叻就係發言鞭策，「發言」、「鞭策」，但民建聯就會實際去做。
|
