[2004-10-22] 特寫：「立會小馬哥」 四年後勇退
有「立法會小馬哥」之稱的陳智思，早前以年僅39歲的「年青有為」姿態，成為行政會議「新貴」，在外人看來政治生涯如日方中。不過，他卻在這時出人意表地宣佈，已經計劃4年後將告別從政生涯。何解？原來令他心甘情願放棄議席的，是家中「美人」，還有一對「活寶貝」。
事業家庭政壇難兼顧
事業、家庭及政壇「三得意」的陳智思，強調選擇4年後離開議事堂，並非厭倦政壇風雨，只是家庭才是他生命中的第一位，「我唔覺得我可以照顧到家庭需要，照顧到工作需要，又照顧到政治需要，我諗我做唔到!」他強調10年從政經驗已經不錯，日後亦並非斷絕政治，依然會默默參與，更會鼓勵「新血」加入，「當我完成未來4年工作，10年係一個好階段，到時係時候放番時間係屋企人身上。」
伴兒成長 最為珍惜
年僅18個月及4歲的兒子，雖然仍未識得開口投訴，但偶爾童言無忌地吐出一句：「爸爸點解又唔係屋企」，已經教身為人父的陳智思慚愧。他說，「我今日已經覺得壓力好大喇!將來小朋友大了，要求會更多!」他深明「後悔莫及」的道理，「家庭最重要嘅階段過咗就係過咗，我唔想後悔，老實講句，如果我對政治仲有興趣，10年後仲有機會，生意亦有好多人可以幫我手，但係家庭我唔可以派人去做呀！」他笑言並非要建立「好男人」形象，只求一盡父責，相伴兒子成長。為了在家中也起著「關鍵」作用，陳智思決心與政壇說再見。
健康問題 老父擔心
退出政壇，太太當然支持，而任職亞洲金融集團董事長的父親陳有慶也舒一口氣，陳智思坦言：「佢好支持我呀!佢由我參政開始，當然開心我做到立法會同行會啦!但係都好擔心我係身體健康方面，係咪可以負荷到。」家人對他肉緊非常，但自18歲開始便與「血管收縮症」為伴的陳智思，卻從不刻意過分關心自己的健康，他笑說：「如果我要睇，我咩都唔做得，因為我長期食緊藥同睇醫生。」
|
