[2004-11-16] Peter求去 不做文化差異夾心人 放大圖片
王冬勝如此人才，睇怕好多間銀行會排住隊爭佢。
張三笑
華人高層離開外資公司，引起全港關注，三笑問齊銀行界朋友，都認為係「冰封三尺非一日之寒」。渣打先有前中國區總裁黃遠輝，再有大中華區總裁王冬勝先後掛冠。以表面證供加上三笑推斷，王冬勝辭職背後可能有好大原因是為香港員工抱不平。
中國人身處外資公司工作，與一眾外國人相處，處事點都會有些文化差異。外國人重系統，中國人重傳統，兩種文化有時的確未必能夠共存。三笑之前同王冬勝傾開，佢都話自己有時會因為文化差異而做夾心人，所以壓力都幾大。
人才搶手 好快便有高就
不過，塞翁失馬，焉知非福。以王冬勝人才，絕對是銀行界的搶手貨，加上佢出任企業高層都有一段長時間，所以除銀行外，各大機構都可以向佢埋手。聽講佢依家都有唔少選擇，可能好快就會有高就。
渣打方面，三年前由渣打銀行香港區總裁擢升為集團行政總裁的戴維思，因渣打一周內先後發生裁員200人及大中華區阿頭王冬勝辭職後，有傳他飛來香港坐鎮一星期以穩定軍心。昨日出來見傳媒的戴維思雖未有交代自己是否來港坐足一星期，但據佢透露的行程活動，就肯定是安撫民心的工作。
坐鎮一周 戴維思穩軍心
戴維思話，前晚自己同香港同事食晚飯時，唔覺得同事因為王冬勝離去而有太大負面影響，昨日早上巡分行時，亦唔覺得渣打因為要收縮零售銀行業務，而令零售銀行服務表現受到影響。
渣打向來想做「藍籌」，戴維思亦曾很有信心話渣打應該會做藍籌股，但因在港交易量不足，不符合當藍籌股的資格。傳媒朋友當時見戴維思咁有信心，曾經問過渣打有何良方妙藥化腐朽為神奇，原來戴維思的「絕橋」就係叫王冬勝出來多點曝光，讓更多人認識渣打，渣打就可以成為藍籌。
不過，渣打管理層的風向亦隨住銀行策略改變而改變，戴維思昨日話銀行業務不是個人的事，而是著重團隊精神，所以王冬勝離開不會影響渣打的業務，而且他們再見亦是好朋友。
|
放大圖片
