|
韋 君
美股隔晚新年首個交易日先升後跌，埋單計數唔見53點。在外圍市況欠佳，以及市場憂慮資金流走下，港股昨日掉頭急跌，一度失守萬四點關，收市報14045，跌191點或1.3%，成交再度突破200億，達214億元。
中盈有意在澳門展拳腳
中盈控股(766)昨日發表通告確認，其全資附屬公司中盈澳門旅遊發展，現正就一獨立第三者，在澳門合作發展酒店項目進行商談。受到消息刺激，中盈最高攀升至0.475元，收報0.455元，仍升0.045元或10.98%，成交金額達9103.5萬元。中盈過往成交一向唔多，但昨日成交顯增，已反映有大盤入場掃貨。中盈早於去年下半年已在澳門設立分公司，便是睇準當地開放賭權所帶來商機。由於中盈業務正在積極轉型中，繼內地房產到燃氣業務後，照睇變身賭業股的機會唔弱也。睇番中盈的股東構架，主要大股東現時持貨達67%，以現價市值3.64億計，街外貨只不過1.2億而已，呢隻股勝在背景簡單，街外貨唔多，也難怪已吸引炒家埋位。中盈52周高位曾見過0.72元，相信要重返高位應非難事，可加以留意。
東方明珠實業(600)上周四起停牌，傳聞角逐今日開業的澳門金龍酒店，聽講已落入大廚坤手上，果如是，東方明珠今日可望復牌，料又成為濠賭股新貴。
坊間盛傳東方明珠以作價逾10億收購金龍酒店。位處新口岸的金龍酒店擁有400多間房及118張賭檯、六個賭廳，成為希臘神話娛樂場開業後新一家大型酒店賭場加入競爭。
基於05年已預期有可觀盈利貢獻，基金選擇澳門概念博彩股，東方明珠已居前列股之一。此股停牌前收0.82元，今日若然復牌料會進一步上升，擺脫毫子股變蚊股級數，不妨順勢跟進。
|
