[2005-03-22] 中海外成績靚孫總交棒放心 放大圖片
孫文傑昨日親身來港主持業績會，他伸出十隻手指，是否給予孔總100分？
．張三笑．
中國海外今年業績大好，主席孫文傑昨日亦親身來港主持大局，但估唔到係佢最後一次為公司主持業績大會，皆因由今日開始佢將辭任董事局主席一職，由副主席孔慶平接棒；但佢就應邀成為名譽主席，仲同三笑話目前要專注母公司中國建築工程總公司的業務，母公司隨著業務規模逐漸擴大，風險亦相應增加，所以驚分身不下。
今年要晉全球500強
孫總向來行事低調，佢同三笑講，自01年起的4年來才首次在業績會露面，主要係對孔總好放心，認為在孔總及董事會的領導下，公司業績比佢主政更好，公司効亞洲金融風暴的創傷已逐漸復原，反映領導交接已平穩完成。孫總同孔總亦心情大靚，兩人經常笑到見牙唔見眼。
兩會期間低調避傳媒
孫總01年起升任為母公司總經理兼上市公司主席，去年為母公司創造合約額1,239億元人民幣（下同）、950億元的收入，均比2000年增長一倍，純利亦升逾24倍，母公司去年11月列入國資委首批49家中央企業主業名單，為唯一的建築與地產企業入圍，而今年的目標則是帶領公司跨入全球500強。
年年都有參與兩會會議的孫總，今年卻唔見影蹤，佢話其實有出席會議，只係坐在會議後排不起眼的角落，仲講笑話，見到傳媒佢就刻意將自己藏起來。
孔總49歲接棒前景佳
昨日接棒的孔總，現年49歲，畢業於哈爾濱建築大學，87年進入中國海外，現時亦兼任行政總裁一職，而執行董事崔鐸聲將升任為副主席一職，同時靳新中將獲委任為執行董事。三笑都替幾位高層高興，三人現時年薪分別為406萬、276萬同120萬元，仲按表現發放花紅，包埋現有同購股總數共1966萬、1638萬同262萬股，升職後薪酬調整至幾多，應該幾可觀。
|
放大圖片
