[2005-10-31] 伯南克妙法解通縮

放大圖片

　通脹話咁易

．張三笑．

　市場憂慮美國通脹情況惡化，獲提名出任下屆聯儲局主席的伯南克(Ben Bernanke)，一言一行都會被解讀成對通脹的睇法。其實，伯南克近年最驚人的言論，原來唔係來自通脹，反而係早年對通縮既一番獨特見解。

　「911」之後，全球經濟一度倒退，多國更深受通縮之苦。眼見美國經濟了無起色，聯儲局主席格林斯潘果斷減息，令美國息口長時期停留於歷史低位。由於美息著實太低，市場擔心，假如美國最終好似其他國家一樣陷入通縮，聯儲局將會因為無息可減而變得黔驢技窮。

狂印銀紙大派街坊

　不過，當時在聯儲局有份議息的伯南克，講了一番可謂幫格老大打強心針既他認為，美國情況再差也不會出現通縮，因為只要政府無限量咁印製美鈔，然後搵架直升機把一籮籮新鈔，好似散發傳單咁在美國本土既上空大派銀紙，不信美國仲會有通縮。

　伯南克外表文質彬彬，是十足十的學者，他的言論應該不至於這麼激烈，所以大家都唔使太認真，當個笑話聽完算了吧。其實，他講通縮講得咁過火，無非係要力撐格老的低息政策，表明只有長期維持低息、刺激商業投資活動，美國失業問題才可以解決，帶動個人消費復甦。事實證明，美國經濟在低通脹的環境下快速增長，顯示初試啼聲既伯南克已經係一員猛將，同格老可謂惺惺相惜。

學者風度難得咁激

　伯南克不似得格老般喜歡舞文弄墨，把聯儲局的睇法說到有咁玄得咁玄。伯南克的風格比較率直，能夠以簡單的詞句表達深奧難懂既貨幣政策。要老百姓了解如何避免陷入通縮真係好難，但如果話要成籮銀紙至可以買條麵包，老百姓就一定知道通脹來了，通縮自然不復存在。這就是伯南克的語言威力。