 放大圖片
【本報訊】（記者 許紹基）早前有雜誌報道有「翻版錢志明」假扮成TVB電視廣播業務總經理陳志雲，騙得兩位上屆的香港小姐葉翠翠及陸詩韻的電話，並藉機邀約兩人約會。兩位主角葉翠翠及陸詩韻都承認收過電話，因有公司支持及保護，所以唔係太驚。藝員都覺得事件被揭發報道是好事，可提醒新入行的人要懂得自我保護，不要受騙。
陸詩韻昨天為節目《娛樂直播》錄影前接受記者訪問，她說：「其實件事公司已在處理中，而家不方便講。（陳志雲讚你美貌與智慧並重，沒有受騙喎！）都係雜誌報道𣜭。我係有接過電話，之後亦通知了公司及警方；始終有公司back-up，公司會決定點做。」
公司及警方在處理
陸詩韻表示事件發生之後就沒有再收過電話，當問到她會否因此而轉電話時，陸詩韻直言自己有兩個電話號碼，以分辨朋友或是工作上的用途，所以都安全。「其實我未做這行都已經畀人玩過電話，我覺得無可避免，所以要好小心，總之自己要清醒一點。」
她稱今次是入行以來第一次收到這種電話，但不擔心再接到電話，因有公司支持。問她會否怕那名行騙者現身？她道：「唔怕，就算佢現身我都唔知係邊個，近來亦唔發覺有古怪或陌生的人接近我。」
葉翠翠昨接受電話訪問時表示：「其實我收到電話時乜都冇講就收線，所以對我冇影響。我自己亦唔係太驚，首先我覺得其實只係玩電話。第二，就算係真，我同詩韻都唔會理、並唔會信。如果真係有個用這種方法去呃人的人，我希望今次件事報道了之後唔會再有人信佢，亦希望佢唔好再滋擾其他人！我覺得好搞笑，佢扮陳生，其實佢都識搵野，識得扮個咁知名的人士，所以當我聽到陳志雲個名時都『敬一敬』，否則我真係即時收線。總之今次件事就好似《警訊》咁囉！」
想「包」敖嘉年
該名騙徒第一位接觸的藝人敖嘉年昨亦承認接到有關電話。他說：入行之初曾被人提出「包」他的要求，當時的「待遇」雖然很好，每個月有三萬元及有名車給他用，他始終沒答應。對於今次的事件被報道出來，敖嘉年覺得是好事，因可提醒新入行的人不要受騙。
葉翠翠的緋聞男友李逸朗則表示，他一早知道此事，他說：「翠翠有打電話畀我，其實事發那天我已經知道，因為佢原本約了我食飯，後來因要返無線落口供所以『甩我底』。我覺得今次似係一個鬧劇，似係fans玩電話！」李逸朗覺得很危險，他說：「就算係一個普通女性，收到這些『問價』的電話，都覺得不受尊重，是一種侮辱！」
|
放大圖片
