|
若數最支持煲呔參選的特區高官，大概非「鬍鬚曾」曾俊華莫屬。多次在工餘時間幫煲呔助選的鬍鬚曾，昨日再度現身漁灣邨，除一貫落力派單張、呼籲市民支持煲呔外，他今回還充當煲呔保鑣，一邊跟到場示威的「阿牛」曾健成協調，又把記者等隔開，令煲呔可以「前路無阻」。
鬍鬚曾這位義工認真不得了，昨日繼續「做好呢份工」，既不斷向街坊派單張，在離開前見到煲呔前路受阻，他即刻一個箭步趨前為煲呔開路，不愧練過功夫，動作之迅速令在旁記者一時反應不過來，當認出這位盡責「保鑣」竟是堂堂特首辦主任時，他二人已走進車內，跟眾人揮手道別。
再當和事佬 搞掂阿牛
而在煲呔到步前，鬍鬚曾也充當「和事佬」，跟社民連的示威者進行協調。事緣長毛和阿牛等人因收風時間有誤而早到，數人在現場不停叫囂。當鬍鬚曾一見，立即走到阿牛身旁「密密傾」，兩人握手又交談，好不熟稔。鬍鬚曾後來再走到阿牛旁邊，記者只見兩人互搭膊頭，有講有笑。阿牛事後自稱，早在鬍鬚曾擔任末代港督彭定康秘書時，兩人便已相識。
|
