 放大圖片
■葉童和郭政鴻飾演兩夫妻，角色卻有點不討好。
【本報訊】影后葉童在《師奶兵團》中扮演一個靚師奶，卻遭網民批評其演技浮誇，對此她表示無所謂，因每個人的觀感不同，最重要是套劇有人談論。葉童道：「我係用最平淡的方式去演繹，咁都叫誇張？誇張的定義係咪好寬？我相信呢位網民係偏好另一種師奶，雖然自己的角色不太討好，甚至有些衰，但佢做的都係一般人會做的事。」
一向做主角的她，對於要做衰人會否不開心，她笑道：「事實是這樣，當知道要同雯女及娥姐合作我好開心，但當時只有大綱未有劇本，而編審講故仔好叻，加上自己好珍惜呢個合作機會所以就接了，後來看了頭四集劇本，發覺自己的角色乞人憎，於是搵監製再傾，佢就叫我唔使驚，話會令家庭觀眾認識我多些，但到依家我都好懷疑，不過接了就冇說話好講，(是否覺得被騙？)冇！自己係心甘情願想同他們合作，我亦唔介意演乞人憎角色，只係今次同原先的諗法唔同，人係有好有惡，今次就偏向惡，不過我會睇整體效果，而且拍攝期間都幾過癮。(那麼可有因戲分少不開心？)冇，但覺得自己的角色方向被誤導。」
監製和葉童有溝通
對於葉童被批評演技浮誇及戲份少一事，鄧萃雯坦言道：「我一定冇呢個問題，因為同小朋友合作好辛苦，我寧願多些時間睡覺，(不怕被誤會在晒命？)唔驚，事實上我覺得佢好專業，好似有一場戲佢同陳法拉一齊落水，當時全程有記者拍攝，但上水時化妝會溶，加上可能走光，所以若換轉係我一定黑臉，不過佢好落力演出，我好欣賞佢。」講到戲份少，雯女笑道：「我自己一樣遇到這樣的事，但同佢的宗旨一樣，看開點兼全力以赴，而且仲會加倍努力。」
另外，監製林志華並不覺葉童的角色乞人憎，反而聽到有人讚得意，亦覺得三人戲份平均，所以對某些人的反應覺得是意料之外，他道：「網民是另一批人，但都是觀眾之一，(葉童可有要求改劇本？)我們有溝通過，亦有跟佢的意見作出修改，但唔止佢一個，其他人都有修改。而結局講到佢染性病會令人同情，睇佢點處理同老公的婚姻，處理得好會加分，(會否拍續集？)睇觀眾反應而定。」
|
放大圖片
