 放大圖片
■瘦夫配肥妻，認真閉翳。
有睇過《肥佬教授》的觀眾，都會為愛迪梅菲的扮野演技讚不絕口，今次愛迪梅菲再展奇技，在《我愛籮霸》中一人分飾三大主角，唔單止踩過女界扮超級大肥婆，仲跨國界扮埋中國阿叔，神似程度令不少睇完戲的觀眾都唔知道三個角色均由愛迪梅菲一支公玩晒！
別以為愛迪梅菲單靠化裝扮野，其實他在《我愛籮霸》的演出相當考演技，三個角色各走極端，演繹「籮拔仔」扮黐𡘾筋口窒窒，做「籮霸」就聲大夾惡一輪嘴高八度，還有「黃先生」的古怪口音，都神似得令人拍案叫絕！
愛迪梅菲每次扮演「籮霸」單是裝身化裝，便要花上2、3小時；扮演「黃先生」更花時間，因為單是面部便要鋪上11塊矽膠面皮，由於質地超薄幼細，需要小心翼翼逐層鋪上，一塊面要搞足4粒鐘！幸好辛苦有回報，愛迪梅菲拍攝第一場「黃先生」的戲份時，完全沒有人認得他，連與他合作多時的對手古巴高汀也未能把他認出，只以為他是一位普通的中國阿叔，搞到愛迪梅菲忍無可忍，要大喊一聲：「係我呀！」可見他的造型如何以假亂真！所以愛迪梅菲話《我愛籮霸》絕對是一部特技喜劇！
|
放大圖片
