 放大圖片
【本報訊】一連四場的「仍然最愛林子祥杜麗莎演唱會」前晚於紅館開鑼，葉蒨文、杜麗莎丈夫、何超瓊、何超鳳、何超蕸、程介南、朱潔儀、鄭融等均去捧場，演唱會以心形舞台設計，阿Lam和杜麗莎三十年前首次一起開演唱會，事隔多年，兩人默契依然。
杜麗莎整晚換了六套歌衫，當中不乏低胸大露背，阿Lam和杜麗莎於台上不時互窒大放笑彈。阿Lam笑說：「我怕凍，所以手要暖。」杜麗莎則指自己怕熱，阿Lam即取笑說：「所以要露咁多。」杜麗莎則自嘲愈老愈要露得多。
阿Lam和杜麗莎談到當年於夜總會唱歌，他笑言：「大家都係在夜總會出身，不過那些夜總會都拆晒，香港最鍾意拆野，希望個（皇后）碼頭唔好拆，把聲唔好拆。」阿Lam落台握手，有觀眾叫他「阿Sam」，阿Lam即笑言：「我係阿Lam，唔係阿Sam，試過幾次出街畀人嗌阿Sam，阿Sam係乾淨冇鬍鬚，鍾意錫人，佢演唱會唔知啜咗幾多人。」
見英國老師哭成淚人
阿Lam握手時收到一隻青蛙公仔，接著他唱《可以不可以》，並揚言唱到音樂停面前觀眾便要鍚他一啖，他說：「我係青蛙，只需要一個吻，如果真係埋到嚟你唔想錫，可以叫我去第二度，但唔好叫男人或你老公。」
杜麗莎又說：「我同老公23年，佢3個月前問我同你的緋聞係咪真。」阿Lam亦笑指葉蒨文亦問過他同樣問題。二人合唱《STAY AWHILE》，杜麗莎笑指歌詞天真又鹹濕。 兩人升上小舞台大跳貼身舞，期間阿Lam鬼馬地說：「第一次演唱會有床上戲，原本諗住擺張床効台，但個台太細。」杜麗莎聞言即拍打阿Lam。
杜麗莎的女兒及學生均有上台伴舞演出，杜麗莎跳得投入連飛甩耳環亦懵然不知。
另外，阿Lam見到英國的英文老師即忍不住哭成淚人，他說：「就嚟父親節，親生父母係好緊要，仲有一位就係我先生。」話畢便走到台下，當時阿Lam已開始飲泣，阿Lam走到台下送了唱片及與老師擁抱，場面感人。
盧冠廷乘機呼籲環保
神秘嘉賓盧冠廷出場反應十分熱烈，盧冠廷笑言：「估唔到阿Lam咁sensitive，我下面聽到差些想喊。」盧冠廷借出十分鐘時間於現場呼籲觀眾要環保及愛惜地球，話畢，兩人合唱《最愛是誰》，盧冠廷說：「多謝佢畀機會我講呢番說話，仲有面對我既恐懼就係唱歌。」期間盧冠廷走到台邊握手，觀眾反應十分熱烈，他說：「17年冇見喇，多謝晒！」
「貼身舞」光明磊落
演唱會後眾人在後台祝捷及接受訪問，問到兩人於台上大跳貼身舞可怕返家被扭耳仔？杜麗莎笑言：「只係台上做野，廿幾年夫妻。」阿Lam則說：「拍戲都係要咁。」杜麗莎笑言於台上跟阿Lam才好玩，台下卻是冇乜野講。期間杜麗莎經常被升降台嚇親，要即時捉實阿Lam，阿Lam之前有墮台意外，問到他可有陰影？他說：「我都以為自己會驚，點知佢驚過我。」
另外，之前林子祥屢傳婚變，前晚太太的葉倩文整晚站在控制台投入睇騷，每當阿Lam返後台換衫，Sally亦跟隨，以行動澄清婚變傳聞。
|
放大圖片
