 放大圖片
■娜奧美金寶又脫罪。
名人明星一舉一動都受關注，而今時今日大眾就對他們的負面消息更感興趣，部分置身於鎂光燈下的明星也樂此不疲地做出各種醜行，為讀者提供不少茶餘飯後的「佳話」。好像名模「黑珍珠」娜奧美金寶，她以毆打女傭打出名堂，但就幸運地每次都不用坐牢，最近一單官司亦告庭外和解。
先來數一數黑珍珠的記錄。2000年，娜奧美金寶用手提電話攻擊助手Georgina Galanis，並用力扼住對方喉嚨，結果被判賠錢兼上情緒管理課程。之後，娜奧美又用手機擲向女傭Ana Scolavino，同樣不用坐監，只罰判社會服務，做五天清潔工人。而最後這次(暫時而言)黑珍珠因為遺失行李遷怒助手Amanda Brack，不單醒對方幾巴，並以電子手賬BlackBerry做攻擊性武器，事後又撕碎對方的護照，令其困身在摩洛哥。結果，黑珍珠今次連清潔工人都唔使做，事關她與受害人達成庭外和解，法官已經撤銷單case。至於黑珍珠畀幾多錢擺平件事就不得而知。
Pete忽然早到
而個底同樣花到死的毒男Pete Doherty，經常為吸毒官司出入法庭，並且又經常唔記得上庭。但上周二他卻忽然轉性，為戒毒療程的聆訊上庭報到，結果發現今次是10月17日先夠鐘，認真搞笑。外國傳媒就話，Pete上月另一單涉嫌藏毒case要在六月上差館報到，所以好有可能係去錯地方喎。Pete身邊友人就話「咁多日要記，搞錯唔出奇」。咁又係，Pete都唔記得自己一日吸幾多次毒啦。
比起黑珍珠同Pete，Paris Hilton就真係唔好彩，而家仲身在監獄做囚犯。不過她的監獄鄰居就好多謝呢位酒店太子女，因為自Paris入住監倉後，獄方驚死Paris食唔慣，於是將食物質素提高，結果益埋其他囚犯有啖好食。為怕有人對Paris不利，獄方又提早釋放某些犯人，真係唔該晒。而路透社資深娛記Steve Gorman昨天就撰文稱，Paris未坐監前為宣傳節目《The Simple Life》，曾接受其訪問，不過公關就為Paris擋去關於無牌駕駛的敏感問題，Steve Gorman大嘆明星受到過分保護，出街的訪問時時經過多重修飾。咁其實有咩出奇呢？■文：飛馬
|
放大圖片
