 放大圖片
■陳淑芬講到好友肥姐不時為某些報道激氣，也覺得很不平。
【本報訊】（記者 李思穎）肥姐沈殿霞病情有變的消息千變萬化，自從她被琴姐踢爆正接受化療，但見肥姐經常進出醫院，又頻頻與好友會面，四方八面的揣測便隨之而來，昨日肥姐的好友陳淑芬（陳太）透露肥姐的近況幾「OK」，不過肥姐看到很多不實的報道時，便很激氣。雖然肥姐不斷受到傳媒的騷擾，然她並沒打算飛返加拿大靜養，沒有必要為狗仔隊改變生活方式。
陳太透露：「我經常都去陪佢，唔想佢周街去，肥姐好喜歡出街，不過依家出街便會有好多人跟住，其實佢唔需要人扶，只係人太多怕會撞到佢，所以我先拖住佢，點知出來的報道變成佢入去唔使拖，出來就要拖，其實一個病人好想快些復原，點解好似講到咒佢（指報道），好鬼乞人憎。（肥姐可會考慮飛返加拿大靜養？）我們覺得無必要，無需因為狗仔隊而去改變生活方式，佢主診醫生係香港，又要去檢查，點解要連條命都唔要飛返加拿大，狗仔隊係咪想害死佢？」
肥姐八卦令自己激氣
問到肥姐情況，陳太謂：「幾ok，佢行得、食得、傾得，又會打麻雀，點解要搞到佢咁憎，最嬲係佢行出去食飯，都會話佢忍痛行出來，面尖又瘦，事實上佢除了消瘦了，其他都沒有問題，以往佢無注意糖尿，現在有糖尿教授看著她飲食，肥姐現在少吃甜，又吃少了，自然會比以前瘦，並沒有其他原因。」
陳太又說：「肥姐八卦，有時人家又會把外間的報道八給她聽，最後搞到自己好激氣，大家不要再咒肥姐了，現時肥姐每隔一、兩星期都要返醫院見醫生，有時會留夜休息，視乎做什麼檢查，有時因第日要睇另一個醫生，為免進進出出才留一晚，只求方便。」至於肥姐會否看契仔學友的演唱會？陳太指肥姐話要去睇，學友表示會預她睇一場。
|
放大圖片
