 放大圖片
■洪金寶不介意被人傳死訊，聲言如此整蠱，說明還有人記得他。
昨日晨早落街買報紙，報紙老板娘細聲問我，有冇聽到洪金寶死咗？我問佢在哪裡聽到的，她說有位電影工作者朋友告訴她的，她好喜歡睇洪金寶的電影，希望不是真的。我呆了一下，回答她一聲假的，但，一小時之後，有報紙同電視台的記者朋友來電打聽這事，哦！大膽假設，小心求證，又係時候發揮了。
內地開工 親接電話
先打洪金寶手機，唔通；打元彪電話又唔通，咦，有問題喎！好彩，元華的電話通喎，佢在澳洲，佢都有不少人打電話畀佢，問這件事，佢只知道大哥在內地拍戲，唔會有事發生的，早兩日重通過電話，元華叫我再打電話畀三毛（洪金寶），佢都會馬上打多一次畀大哥，問下到底發生甚麼事。
再打電話畀洪金寶，電話通了，接電話的人不是三毛大哥，對方問我是誰，語調好嚴肅，我說是記者XXX找他，佢叫我等一等，來接電話的人聲音正是三毛大哥洪金寶。他說：「我仲未死，開緊工！」聽見三毛把聲咁大，一天光晒，佢未死！
超級馬迷 疑遭整蠱
三毛說現時在山東拍一部戲，要聖誕節才可以回港，但不知道會有人傳他死咗，整蠱他，開玩笑吧，他不會介意，起碼，仲有人記得他這位洪金寶。原來有人整蠱三毛大哥，但係甚麼理由去作弄三毛呢？佢唔會有仇人，但昨日係賽馬日，會唔會有人整蠱三毛，在賽馬日放料話佢死咗？據知三毛最喜歡賭馬，賽馬日無論他在山東或澳洲，甚至在中東地區拍緊戲，都會好關心每一場賽馬過程，而且還會用電話落注，四串十一、三T、獨贏、連贏都一一落注，他是超級馬迷，試過中大冷門六環彩，整個電影圈都知道，祝三毛大哥身體健康，再中六環彩！ ■何江西
|
放大圖片
