|
養兒方知父母恩，往日聽人講：「爸爸、媽媽湊大自己好辛苦」，現在阿廉十分明白這感受。「小時候我有哮喘病，做體育老師的父親常揹著我，行幾條街去看醫生，現在自己做了爸爸，就深深體會父母恩。」曹永廉的爸爸現70多歲，阿廉把對家人埋於心中的愛表現出來。「我發現BB好注意大人的一舉一動，你做任何事都會望實你，有專家研究過：『咪睇BB細細個，好似傻頭傻腦，但其實已經不斷吸收新事物』所以現在我對父母，會把關愛表現出來，小朋友看在心中，將來有樣學樣。」
體罰囝囝事後心痛
現代父母，多不贊成體罰，阿廉對此抱開放態度。「我那年代，父母邊有時間同我們傾偈，一有不對就打，我都贊成打下手仔、pat pat，因為小朋友還小未懂說理，輕輕力打下，佢會印象深刻些，不再重犯。」那阿廉有沒有打過BB呢？想了一想他表示有。「那是在他2個月大的時候，有一日BB喊咗成2個鐘都唔收聲，我咪輕輕用手指，打佢面頰，同佢講：『你咪曳曳啦，再喊就唔錫你』點知我講完，個仔喊得仲大聲，眼神好似好嬲咁望住我，真是睇到都心痛。事後同朋友分析，原來BB仔個肚有痛風，唔舒服，所以喊得咁可憐。」對於兒子的將來，阿廉不敢畀太大的壓力，只要他健健康康地成長，大家以朋友方式溝通就OK。
|
