 放大圖片
■見到桌上的食物，Niki已忍不住要開動啦！
採訪：植毅儀 攝影：彭子文 髮型：Debby Kwan@Hair 服裝：AX Armani Exchange 場地：國金軒
鼠年工作忙得不可開交的周麗淇（Niki），於農曆年間放了3日假。新一年，Niki工作繼續忙不停，剛推出的唱片要加印，她更親自設計唱片封套。雖然如此，Niki仍親自為本報讀者炮製七彩燕窩鮑魚撈起，希望自己牛年工作順利之餘，全港市民都可以撈到風生水起，財源滾滾、年年有餘、豐衣足食，人人安居樂業！
已經好多年因工作而在外過年的Niki，難得一年在港度歲。Niki表示最難忘小時候跟婆婆一齊整蘿蔔糕及上海湯圓，她笑說：「因為刨蘿蔔很辛苦，所以好難忘，但點辛苦都是婆婆親手做的，所以好好食。」
今年新年，Niki學整新年菜畀媽咪同屋企人品嘗。她說：「原來現在新年菜既健康又矜貴，像這個七彩燕窩鮑魚撈起，把香甜的哈密瓜及密瓜切成絲，顏色七彩繽紛，再用上矜貴的燕窩及鮑魚，加上核桃及火鴨絲等，再配上香濃鮑汁，味道清甜，口感清爽，非常適合一家大小享用。」Niki祖籍上海，以往農曆新年都會提早訂購年糕和蘿蔔糕等賀年食品，炮製廣東賀年美食還是第一次，見到一桌琳琅滿目的食物，已經開心得食指大動。
本是孻女的Niki，從小是婆婆湊大帶大，故和公公、婆婆感情特別深厚。爸爸和媽媽又很孝順，耳濡目染下，Niki至今仍堅持同家人一起住。「08年有好多事發生，家人是我的生命泉源，我覺得一家人開開心心已經好足夠。同埋上海人會習慣自己炸油角，我見到個油起晒泡泡，會大叫「起泡泡啦」，婆婆會立即阻止我，不讓我講下去，我估婆婆怕我講不吉利的說話吧。小時候，我很愛吃年糕，愛它韌韌的感覺，所以婆婆會整畀我食，但現人大了，甜品會致肥，只可適可而止，但呢個金箔燕窩桂花糕，甜味適中，又養顏。」話畢，Niki已急不及待把眼前的桂花糕放進口中。
細數兒時新年趣事
說起新年往事，Niki更滔滔不絕停不了口。她表示小時候要跟爸爸到美國過新年，很多時要打電話回港向親戚越洋拜年，卻引出不少笑話。她說：「大家都知美國同香港有時差，好多時去到美國要打電話回港同親戚拜年，但細路仔點記得有時差，每次美國年初一我同家姐歡天喜地打回來香港，點知香港親戚就會話我知已是大年初二，十分掃興。」除此之外，原來Niki還有一件她形容為超級瘀的新年趣事。「我好鍾意過年，因為新年一定買新衫，我又好鍾意行花市。有一年，媽咪同我講食完晚飯就去行維園花市，點知我聽完立即扁嘴，之後更喊著話唔去維園花市行年宵，話要去維多利亞公園行年宵。媽咪用莫名其妙的眼神望著我，後來我先知，原來維園就是維多利亞公園，哈哈！」聽完這個維園故事，在場人士都笑得腰都伸不直。
|
放大圖片
