 放大圖片
■吳君如雖為「中女」，但坦言唔恨嫁。
吳君如對上一部電影，已經要數03年拍的《金雞2》。潛伏5年，君如於農曆新年夥拍靚仔古天樂在《家有囍事2009》中大發笑彈。近日君如主要以主持工作為主，包括無線的《星星同學會》節目及商台節目《嘩！嘩！嘩！打到嚟！》。正以為君如全力復出幕前工作，冷不防她表示現在陪愛女是正職，其餘是偷不用陪愛女的時間出來做兼職，未來日子，她更可能孟母三遷，做阿四陪女兒去外國讀書。
《家有囍事2009》中，吳君如飾演事業有成，但三十多歲仍沒有拍拖結婚對象的「中女」。對於「中女」問題，君如笑言細細個已經知道自己需要一個怎樣的男朋友，更沒奢望會有像L君的人會出現。至於與陳可辛的一紙婚書，君如直言唔恨結婚，因為自己不是陳可辛的附屬品。
生活已形同夫妻
「我一直都冇擔心自己搵唔到男朋友，未識長毛（陳可辛）前，我又未去到『中女』喎。對於感情我好怕改變，好細個已經好現實，知道自己要咩。搵男朋友最緊要係差不多level，大家要自給自足，唔好負累大家。早前記者問我幾時同長毛拉埋天窗，我話生完第二個BB先，點知出來的報道均是『吳君如生完第二胎結婚』。其實我同長毛之前効泰國繒L酒，簽名結婚只是一個形式。同埋我唔明我們的生活已形同夫妻，點解仲要結婚呢？如果你話佢畀一個名份我，咁sorry，我不用男人畀個名份我，我不是陳可辛的附屬品。做呢行最型是獨立個體，所以你見我好少去他的電影首映禮，我覺得沒有這樣的需要。之前《投名狀》北京首映或台灣金馬獎，都係主辦方很有誠意請我先去，如果唔係我都盡量避免。現在我倆財政獨立，現況好好。」
自06年生下愛女陳是知（Jillian）後，原本陳可辛亦經常勸君如多接戲，但君如堅持湊女大過天，寧為愛女放棄一切事業。以往自評性格火爆、沒耐性，現在卻為女兒晚晚講故事，每月花巨款培養女兒成材。「生完個女後，我轉變好大，母性出晒來，對住個女好有耐性，我想我下半生最大的事業就是我個女。我明白湊小朋友唔可能拔苗助長，一分耕耘、一分收穫。好似現在出來訪問或做電台節目，都係等Jillian𠳓咗我先出來。自細我就一手一腳湊佢，一開始咩都唔識，睇書學湊女，初期愛看《The New Contented Little Baby Book》，明白點樣餵哺、BB點解會哭，湊BB最最最重要係同佢close。我日日都見佢同傾偈，有時長毛出埠拍戲，成個星期唔見個女，Jillian真係唔多理佢。」
打算效法孟母三遷
「做母親是天性，以前我沒耐性，但是望著她，急又急不來。好似佢聽故事，我講一百次佢都仲津津有味。雖然她現在只有一歲半，但我會和她講生老病死，令她明白這是人生必經階段。我唔一定要佢成材，但一定唔可以做一口舊廢柴。近期我還教她做戲，叫她扮個嬲樣畀我睇。香港教育始終係結構性問題，古時有孟母三遷，我打算等她大少少就送去外國讀書，咁當然我都跟埋去啦，現在最想生多個，陪下佢。」
|
放大圖片
