|
李自明
09年政改諮詢開鑼一周，市民尚未認真討論特區政府提出的傾向性方案，反對派拋出的「5區總辭」爭拗已經轉移了社會視線，坊間輿論亦幾乎一面倒大篇幅報道反對派因「總辭」失和、內訌，市民討論多數也圍繞「總辭該不該」及白鴿黨應否參與上，反而少見細緻評述諮詢文件的內容。自明與官場老友聚會，老友不勝感慨，亦不無憂慮，直言無論大家認為方案是好是壞，最要緊還是有人討論，如今諮詢被「總辭搶晒鏡」，當局不免擔心諮詢偏離軌道，無法深入，要凝聚社會共識更添困難。
聚焦總辭 忽略普選「中途方案」
看社會主流民意，其實大家都想香港民主「行一步進一步」，但推動民主政制向前發展絕非一人之事，還須集思廣益，廣納民意。官場老友看到眼前境況，不無焦慮，呼籲各界回歸諮詢正軌：「大家應該返回起點，就方案論方案，支持也好，反對也罷，覺得有咩改善空間，都要講出嚟，大家討論又好，爭論又好，而唔係好似剗家咁，大家掛住講『總辭』，完全忽略咗問題嘅真正重心係點樣推動香港民主向前邁進。」
極端自私 只為爭戴「民主光環」
諮詢焦點被分散，可能正中公文袋（公民黨）及癲狗幫（社民連）下懷，皆因兩黨曝光率因此大增，氣勢壓倒其他反對派政黨。有政壇中人嚴斥兩黨行為極端自私：「佢哋叫『爭取民主』口號就叫到聲嘶力竭，但諮詢文件出咗，就剩係顧住玩『總辭』大抽政治油水，爭戴『民主光環』，完全當香港市民『民主向前發展』嘅意願冇到，完全冇諗過要點樣做，先可以達到普選目標嘅『2012中途方案』。佢哋咁做法嘅結果係咩？咪又好似05年咁，各方冇辦法達致共識，香港民主步伐再次原地踏步囉！」
該政壇中人說，若反對派像他們自己所宣稱的，真心為香港民主發展而努力，就應切實思索如何在人大決定的框架內，制訂能為落實2017及2020年普選特首及立法會創造條件的「2012中途方案」，包括對特區政府現建議方案的不足之處提出意見，甚至自己製訂一套反建議，公開讓香港市民討論及特區政府參考。
陷入爭拗 傷害市民參與熱誠
他坦言，目前的形勢，很可能令不少看着反對派這一場「大龍鳳」的市民，會失去切實討論「2012中途方案」的興趣：「心理學有所謂self-fulfilling prophecy（自我應驗的預言）——我相信唔少市民會諗，你班友（反對派）咁玩法，咩嘢進步嘅政改方案都通唔過啦，我再提具體方案嘅意見都無用啦！而市民唔願意去討論具體方案，反過來又會影響到班反對派為霸『民主英雄』嘅冠冕而繼續亂叫價，越玩越激過晒火位，結果政制就真係原地踏步。」
溫和選民 將以選票唾棄激進
因此，該政壇中人認為，要政制發展討論重回正軌，香港市民就要積極發聲，表達對政改方案的意見，尤其是取態溫和的「沉默大多數」，而反對派各黨派內的「非激進分子」，亦要好好考慮他們的未來：「大家唔好唔記得，中間溫和市民未必會喊口號，未必將心中的想法講出嚟，但反對派就要明白，『出得嚟行，預咗要還』，呢班市民會効選舉期間以手上嘅選票嚟表態。如果反對派仲記得05年否決咗政改方案後，効接住嚟嘅區議會同埋立法會選舉中，佢哋得票都不升反跌，就好應該回頭是岸囉！」
|
