■林鄭月娥昨出席中電幼稚園教材套啟動禮。香港文匯報訊 形象硬朗的政務司司長林鄭月娥昨日出席中電幼稚園教材套啟動禮，盡顯柔情一面，孖住中華電力總裁潘偉賢（Paul Sir）聽小朋友講慳電故事，聽到興起仲同佢哋玩手偶公仔，小朋友仲出題考兩位有幾環保，Paul Sir同身兼氣候變化督導委員會主席的林鄭當然輕鬆過關。
能夠吸引到林鄭企定定聽故事，除了小朋友長得可愛，中電亦有功。話說中電知道叫人慳電唔容易，於是從「小」入手，製作了一套以電力為主題，集故事書、兒歌及桌上遊戲於一身的幼稚園教材套《看到的電力》，派給全港近千間幼稚園。林鄭話自己好少出席商業機構的活動啟動禮，但中電今次製作的幼稚園教材套好有意義，值得出席支持吓。
為了吸引同學仔，中電搵本地插畫師b.wing創作故事主人翁「超人中中」，變身電力專家，教小朋友電力安全和節能的基本知識；又搵埋金像獎得獎音樂人戴偉創作兒歌《慳電乖乖》，由出名靚聲的林二汶主唱，配合卡通動畫，等班小朋友唱住歌仔學慳電。
中電指出，相信該公司是首間商營機構咁有心思，製作一套包含不同工具的教材套，送給全港所有幼稚園。新教材雖然9月開學先有得用，不過中電好貼心，已經將故事書、兒歌動畫及工作紙上載網頁www.clp.com.hk/PowerYou供免費下載，趁小朋友暑假得閒，可以先睹為快。
題外話，林鄭兩個仔分別叫林節思及林約希，中間的名字夾埋就係「節約」，中電搵林鄭來為這套講環保慳電的幼稚園教材套揭幕，真係幾有意思。