「精壯神駿」（圖6號）馬主袁仕傑上個禮拜六入沈廄探班，由於阿頭唔喺度，只有副練丁冠豪招呼，袁仕傑探完愛駒之後，突然有感而發，對住小丁講，話自己隻馬唔知係咪真係咁水皮，贏過兩場之後，成績就停滯不前。小丁聽到袁馬主呢番說話，唔知係咪出於一番安慰心，指出「精壯神駿」長期喺一個唔錯嘅戰鬥水準，今次隻馬又有好狀態，有運執個二檔跑，加上羅理雅呢位炒飯哥時有神來之筆，且又係雷神剋星，真係有機會再贏都唔出奇。袁仕傑聽完呢番說話，好似食咗一劑靈丹妙藥咁，又開始對「精壯神駿」充滿番希望。
超強快駒外觀搶眼
除咗沈集成「精壯神駿」有料到之外，呢個倉班手足亦對兩隻戰馬頗有信心，一隻係「大英雄」，另一隻係「超強快駒」。倉主於周一排位朝安排兩駒齊齊到機坪踱步，「大英雄」用丁冠豪，「超強快駒」由助手踱，「大英雄」全程踱嚟搶住走，好鬼有火氣，搞到鞍上人小丁好似扯大攬咁，扯到實一實，唔能夠俾匹馬走甩，另一方面隻「超強快駒」性情就比較溫純得多，只見呢隻馬經常谷起雞公頸，先唔好講狀態靚唔靚住，淨係外觀就經已吸引死人。另外，倉主落咗柯打，周一及周二兩晚，呢兩隻馬每餐多加磅半金山大麥，而且倉主要指定由副練丁冠豪監督打料師打料，睇呢個款，今次夜賽沈集成準備大出擊。
美麗之友馬主探班
「美麗大師」上個禮拜喺潘頓胯下贏馬會一哩錦標，喺進軍國際賽前注下強心針，馬主亦好高興，馬主昨日入倉，並帶咗一袋二袋由佢公司出品嘅美容產品送俾打理呢隻馬嘅馬伕，仲有幫手操呢隻馬嘅幾位騎馬人。呢日馬主入倉除咗派禮物外，佢最緊張當然係睇埋隻「美麗之友」，告東尼仲約埋史卓豐入馬房，除拉隻馬喺地堂俾大家睇外，仲向史卓豐面授機宜，到時點樣發揮「美麗之友」爭勝，而馬主及一批朋友都對呢隻馬嘅狀態相當滿意。
東廄馬房手足又透露，「美麗之友」狀態的確冇得頂，周一排位日午間，倉主安排呢隻馬與廄侶「開心駿馬」齊齊到機坪拍踱，「美麗之友」由副練巫偉傑，「開心駿馬」以湯智傑操刀踱，倉主派埋馬房領班阿排全程監督，只見兩駒馬身肌肉脹卜卜，非常吸引，手足更透露「美麗之友」近期餐餐將飼料掃清光，可以話食得操得，今次用史卓豐披甲負磅又輕，有機會打開在港勝利之門。
方家姐緊張糖黐豆
方家姐喺周一排位日下午約四點左右，跟住三隻戰馬到機坪，並親自監督踱步過程，此三匹戰馬有魯柏軒「傾心星」、「糖黐豆」張德明及「光速銀桂」蘇錦文，大約踱咗十五分鐘左右，又再跟回這三駒返馬房，然後再睇這三駒在地堂沙池打滾，三隻馬之中方姐最緊張係季內兩捷嘅「糖黐豆」，目光經常離不開這駒，事實上，這匹馬今季大熟大勇，於谷草千八兩捷，馬房似乎想用盡一時，畢竟現時馬勇兼且馬房正值搏殺期，是值得一捧。