「海翡翠」由大摩兒子引入，今季戰績優秀，七戰勇奪三冠一亞一季軍，其中兩仗更於谷草千二米以輕鬆姿態掄元，上場新馬錦標千四米只是不敵「巴基之星」取得第二名。「海翡翠」馬主香港高爾夫球會賽馬團體為了慰勞馬房手足，早前就喺火炭某酒家舉行慶功宴。大摩同埋太太當然有出席，期間同大家打成一片，亦有大抽獎環節，整個宴會氣氛熱鬧。
「海翡翠」目前只得三歲，台前幕後都覺得仲有很大進步空間，今次二班谷草千二米配上雷神操刀，其實喺季初八及九月份時，經已由雷神過檔替呢匹馬跳過四課，但之後一直未有揀騎上陣，今次終於獲得雷神垂青策騎，機會自然可以高估，據知今日大摩夫婦已飛往澳洲出席神奇百萬周歲馬拍賣會，未能留港督師，但無論如何，馬房上下都希望「海翡翠」能夠在雷神胯下再添佳績，保持谷草全勝紀錄。