上個禮拜六蔡約翰領兵於杜拜出戰，雖然「華恩庭」排不利的一檔失先機，但香港小記喺杜拜遇蔡神仙並詢問其部署，佢老人家竟然肯由操練到出賽，每一個細節安排都話晒俾小記聽，與香港做訪問時大大不同，即使連同雷神商量點發揮亦都講埋出嚟，可見出到外面真係當香港一班人係自己友。雖然蔡神仙在港開倉，均常派馬到外出戰，但只限於日本，去到杜拜仲係第一次，該日跑完大賽佢冇即刻趕返沙田督戰，所以「魅力知友」捧盃時候只由副練羅富全代領，蔡神仙分身有術，倉內戰馬唔理邊度上陣，都照顧得周到，難怪有咁多馬主支持佢。
今日蔡約翰又部署重兵出擊，有人同佢計過數，今季谷戰表現最好嘅馬房就係呢位澳洲練馬師，有兩成勝出率，上名率更達四十四巴仙。今次夜賽，蔡廄共派出六匹參戰馬，其中四匹「威風霸皇」、「秘密武器」、「勁皇子」及「飛霞」近期全部放喺馬房最下層，原因係方便練馬師巡查，可能呢四隻馬受到大力催谷關係，排位日周一早上，地下馬格發出嘈雜聲，原來「威風霸皇」頻踢起後蹄打向圍板，隔籬就係「秘密武器」，再過幾格，「勁皇子」不停張口向隔鄰「飛霞」噬咬挑釁，其他馬匹受到此類聲音影響，亦贈興嘈埋一份，當然，馬房內出現此情況並非好事，因為正常馬匹在倉內要平靜休息，馬匹起哄情緒當然受影響。副練見到此情景出現，立刻吩咐其他助手將四隻馬調開，分別安排於不同樓層，即使同層數亦將一隻放東，一隻放西，避免再有撩交打鏡頭出現。而大凡蔡約翰馬有呢個火噴噴鏡頭出現必有馬贏，睇吓呢四隻咁好火戰馬，到時又有邊隻幫到大家手。
飛霞杜利萊最合拍
至於五班馬「飛霞」有冇得捧場？其實牌面睇真係冇得玩，最叻都係跑第二，質素見晒，不過，有位蔡廄手足就有唔同見解，佢話目前蔡約翰只有兩隻五班馬，一隻就係由容天鵬倉接過嚟嘅「五星特工」，另一隻係由始至終都未走過嘅「飛霞」。宜家蔡廄個倉咁爆，五班馬唔淘汰必定有原因，今次「飛霞」再由杜利萊操刀，騎者係唯一同呢隻馬贏過嘅騎師，定必收駕輕就熟之效。而主動咬「飛霞」嗰隻「勁皇子」，上次終於贏番場開齋，贏完之後仲係好好火，今次排檔就麻麻，排喺十二檔，不過即使排檔差，假如隻馬依然勇嘅話，亦都唔可以太睇小佢，好似隻「得意繽紛」咁，贏完千二米再出排十二檔，一樣可以跑番個第二名，呢隻「勁皇子」開竅後可望扶搖直上。
秘密武器連珠炮發
另兩隻打交馬，「威風霸皇」用後蹄踢「秘密武器」馬格圍板，兩隻都係新勝馬，其中隻「威風霸皇」上次贏一千米，末段如狼似虎撲上取勝，今次再跑番一千米對手雖然加強咗，但以目前大勇特勇水準，加上雷神近期越戰越勇，呢隻「威風霸皇」大可再下一城。至於隻「秘密武器」，上場由杜利萊都贏得，今次換咗田泰安跑，可望有更強發揮，今次升上三班負磅減輕，依然有機會俾呢隻馬再贏，上述四隻蔡約翰馬，大可睇高多少。