今季最後一項G1大賽周日上演，呢項就係遮打盃，又係大摩出兵嘅時候，總共報咗五駒，「明月千里」、「威爾頓」、「鷹雄」、「精氣神」及「喜蓮彩星」，莫雷拉騎番「鷹雄」，不過呢個周日假如有雨，形勢肯定唔同晒，「明月千里」呢隻爛地王見水即生，上場女皇盃賽後驗到氣管多血，所以只係得第三名，今次再搵番布文騎，當然想補番女皇盃隻鑊，之不過咁，假如跑變化地，大摩仲有隻皇牌，就係「喜蓮彩星」。先講一講個假設形勢，呢個禮拜日一旦有雨，「明月千里」機會就會提增，但「喜蓮彩星」一樣有唔錯機會，呢隻馬嚟香港前，贏過黏地及大爛地兩種變化場地，所以「明月千里」過得「鷹雄」亦未必過到「喜蓮彩星」呢一關。更何況「喜蓮彩星」上場二千四百米，末段一度有威脅「鷹雄」走勢，如果唔係末段有內閃，令到韋達唔可以盡情發揮，呢場頭馬鹿死誰手都未知，而呢隻馬仲有內閃毛病，一來狀態進展尚未理想，二來仲有多少脾氣，呢兩樣問題經時間再改善，今次「鷹雄」想再贏佢都唔容易。韋達自接手「喜蓮彩星」後，真係可以話當佢仔咁，上賽之後，每個禮拜馬房安排快跳工夫，例必由韋達親自主試，當唔係試快工夫時候，呢隻馬日日都見喺內圈踱步，埋門呢幾日，仲要每日踱兩圈，馬房主要訓練佢嘅耐力，假如話揀大摩呢一批遮打盃嘅戰馬，睇嚟呢隻「喜蓮彩星」絕對有機會替盃王大摩擔當出擊主角。