喂阿哥，你班友又屈人政治迫害呀？話說俾法院DQ（取消議員資格）咗嘅社民連「長毛」梁國雄，前晚話地政總署追佢拆晒所有街邊橫額，唔係就逐條同佢計清理費，吹雞叫支持者幫手拆。有網民就聲言地政淨係識針對「長毛」，係政治迫害，有人更加煽動刑毀，叫幫手者順手拆埋民建聯同工聯會等建制派橫額，正一不該！
爛口煽拆建制 俾人勸不該
「長毛」前晚喺facebook話，地政總署要求佢哋聽日前拆晒所有橫額，否則會逐條同佢哋計清理費，又辯稱新界東選區好大，唔少橫額仲要喺郊區，實在唔夠時間拆，曾經向地政提出過延期，不過地政堅持唔得，叫支持者幫幫手，見到有佢嘅橫額就拆，帶返去社民連總部回收再用。
「Siu Hei Yeung」留言話地政「無恥」，又唔見當局要求建制派啲前議員嘅橫額限時清拆，「你哋班地政署廢人奴才，只識針對長毛，直情係政治迫害！」「Eric Wong」就叫人睇吓有無民建聯同工聯會落選人嘅橫額，跟住向地政投訴，「睇吓個×街政府點做。」
「Viren Cheung」更加煽動人順手拆埋民建聯嗰啲，但俾人撳住叫佢唔好。「Kenneth Wu」就質疑拆嘢要架撐，「我帶住鎅刀出街，會否畀（俾）差佬做？」
吳文遠「笑住拆」意味深
社民連主席、「大將軍」吳文遠噚日喺facebook上載一幅舉起「長毛」橫額嘅相，話有街坊自駕巡遊成個西貢，幫「長毛」拆橫額，不過大將軍幅相係笑住嚟影嘅，對比返「長毛」因為被DQ而要拆橫額嘅原因，係咪有啲吹脹呢？
唔知係咪唔想為支持者添煩添亂，「長毛」噚晚亦都話絕大部分橫額已被拆走，「為免混亂或各位白行一趟，請各位停止清拆橫額，社民連會自行清拆餘下的橫額」咁話。 ■香港文匯報記者 陳庭佳