■由於有少少不雅，四眼條熱狗就打格。fb圖片點解好哋哋一個書展，會係熱狗仲好賣過書？喺「熱普城」（「熱血公民」、「普羅政治學苑」同「城邦派」）分裂之下，今年書展某程度上變咗政治鬥獸場，「熱狗」個攤位日日俾人踩場，而咁啱攤位對正有賣熱狗嘅小食部，於是不時有人進行「小學雞」抗爭，對住「熱狗」食熱狗嘞。其中「法國佬」張珈衍同「學生動源」召集人鍾翰林，前日就率眾幫襯小食部，但由於小食部隔籬就係洗手間，俾「熱狗」寸佢哋喺廁所門口食嘢。「熱狗」副主席四眼（鄭錦滿）噚日就索性抽自己水，喺正「熱狗」前首領狗達（黃洋達）塊橫額下面食返「同類」，不過個角度就顯得有啲不雅，俾網民打格揶揄。
同「熱狗」擘咗面嘅法國佬前晚喺facebook上載咗幾幅相，見到佢同幾條友喺對正「熱狗」攤位嘅小食部食熱狗，佢仲叫人把握機會試試，「因為下年仲有無《熱血時報》都未知。」唔知佢哋係咪企得唔夠近「熱狗」攤位，狗達就喺fb反問「原來今日（前日）有人嚟過搞事？」仲話自己忙住做生意、簽名、合照，所以留意唔到。狗達個老婆殘獸慧（陳秀慧）就更加寸，問「匿喺廁所門口食熱狗係咩玩法」，搞到法國佬噚日清晨發晒火：「×你老母！你兩公婆失憶症？我搞事會係咁×和善？係咪好×想我真係玩嘢畀你哋睇吓，回憶吓，老夫係點樣搞事？」唔好唔記得，法國佬當年衝擊過立法會大樓。
黐開分裂之後嘅「熱青城」嘅「藍鳳凰」，前晚亦都上載咗幅相，仲認出埋鍾翰林喺相入面，「不過既然都有五六個人，點解仲係隔九里遠唱歌怪叫，而唔係行入『熱血公民』個檔唱歌怪叫呢？原來『學生動源』嘅所謂將『香港獨立』理念帶進校園，就係喺書展唱歌怪叫呀？」
「藍鳳凰」仲寸黐開「狗主」黃毓民嘅「無敵神駒」仇思達，話佢啲「益友」就係咁嘅「小學雞」貨色。鍾同學亦都無否認佢去過書展，喺fb話「書展熱狗幾好食，不過冇青蒜（清算）就差少少」。
託「熱狗」帶挈，「熱狗」攤位對面嘅小食部啲熱狗連日沽清，神駒前日就話：「『熱狗』啲書賣唔出，蝕到入肉，反而對面小食部啲熱狗日日賣晒。『熱狗』犯眾憎之程度遠超過想像。」不過，有網民影到佢前晚喺展館門口同保安有啲「交流」，唔知係咪又諗住踩「熱狗」場畀人周到呢？一個作者有咁嘅「禮遇」，真係前無古人！
與其俾人抽水，四眼噚日就抽自己水，喺正狗達塊橫額下面食返「自己友」，不過幅橫額上面係狗達無着褲嘅漫畫，而條熱狗嘅礎�喺正狗達兩隻腳中間，就真係有啲不雅嘞，結果咪俾網民打格揶揄囉。
直到噚晚，小食部繼續成為火藥庫，有網民影到拎住熱狗嘅疑似「益友」同疑似「熱狗」喺度比試「三字經」。唉，今日就最後一日，希望佢哋收吓手，畀人靜吓睇吓書啦。 ■香港文匯報記者 陳庭佳