神駒前幾日除咗同班「益友」食住熱狗去「熱狗」攤位踩場之外，成班人仲返去「大本營」明報出版社攤位大唱改編歌唱衰「熱狗」，但好唱唔唱，其中一句唱咗「支那」呢個辱華詞語，除咗私怨行先嘅「熱狗」洗版式同貿發局仲有明報出版社投訴之外，亦都有親建制網媒跟進報道。
不過神駒死都唔肯認自己唱過「支那」，聲稱只係唱「芝麻」，仲話殘獸慧夾埋網媒做佢，荒謬程度同「青症」（「青年新政」）梁頌恆講嘅「鴨脷洲口音」有得揮！
網媒跟進本報報道
我哋前幾日已經報道過，神駒同班「益友」唱咗改編自電視劇《封神榜》主題曲嘅《契弟榜》，其中有一句寸「熱狗」掠水，就係「課夠數，不理『支那人』」呢句，俾「熱狗」投訴，殘獸慧仲話要告神駒。
報道出咗街之後，網媒《時聞香港》就分享咗我哋嘅報道，另外亦有網媒跟進內容，於是成件事就喺網上見光嘞。
神駒之後喺facebook鬧殘獸慧無恥，「為咗打擊政敵無所不用其極，夾硬屈我唱『芝麻』為『支那』，×街死啦你」，又話殘獸慧賤到搵親建制網媒搞佢，「若然我講『芝麻』都被老屈成『支那』，以後『芝麻街』、『芝麻油』、『芝麻糊』、『芝麻醬』等全部要改名避諱，否則『熱血公民』及八婆陳秀慧會一律屈你講『支那』」，「澄清」自己無唱過任何辱華歌曲。
MV「原汁」擺上網無得兜
不過，「益友」都可以係豬隊友，有「益友」熱心到將《契弟榜》整成MV擺上網，顯示出嚟嘅歌詞正正係「課夠數，不理『支那人』」，神駒今次點兜都兜唔到啩？
黐開「熱青城」嘅「藍鳳凰」就話，睇見平時鍾意賭兩手嘅神駒，有機會因為咁冇得過大海，即刻諗起電影《鹿鼎記2神龍教》嘅一句經典對白：「呢鑊你仲唔冚×剷？」 ■香港文匯報記者 陳庭佳