「狗主」黃毓民自從同「熱狗」仲有「青山城邦派」擘面之後，就好似變咗隻菠蘿雞，一時又對之前口誅筆伐嘅「本民青」、「港大幫」態度軟化，一時又幫「雙學」、「左膠」被改判入冊講嘢，前晚佢個網台「MyRadio」台慶晚宴，更加請咗之前割佢蓆嘅公民黨主席袋巾梁（梁家傑）飲返兩杯。之前俾人起勢咁寸菠蘿雞靠黐狗主嘅「熱狗」，仲唔有仇報仇咩？最後兩邊咪又係上演一場網上大龍鳳囉。一餐飯都可以引起一場罵戰，真係唔到你唔寫個「服」字呀！
宴袋巾會金金 饗「泛民」一家親？
狗主自從停止向《熱血時報》每月科水三皮嘢之後，「MyRadio」就俾「熱狗」寸係「燶×（窮鬼）台」寸到??家。不過，話晒10歲大生日，「MyRadio」就算點充闊佬都好，前晚都搞咗場晚宴，除咗一眾「教徒」自己友之外，仲請咗一啲點睇都似係去錯隔離廳飲嘅人，例如袋巾梁同埋退休法官胡國興，而之前「反水貨」反到起晒朵嘅金金（梁金成），當晚更喺facebook上載咗同狗主、民陣召集人區諾軒、「無敵神駒」仇思達、想選「超區」但選唔到嘅陳國強嘅合照，真係夠晒大雜燴！
「熱狗」副主席四眼（鄭錦滿）當晚即刻喺fb翻狗主舊賬，講返自己喺政治上連精蟲都未成形嘅往事：話說2011年狗主仲喺「人民力量」，當年區選佢搞咗個「票債票償」行動，本來只係針對2010年支持政改嘅民主黨同民協，最後就連「五區總辭」嘅盟友公民黨都搞埋，袋巾梁嬲得滯，之後話要重新界定「民主派」，要將「擁抱黃毓民立場」嘅人劃出去咁話。
四眼寸忘本心 菠蘿雞零原則
四眼懶感慨咁話：「今日，黃毓民擁抱梁家傑，擁抱區諾軒，以致擁抱破壞2016年『公投制憲運動』的敵人。出此帖讓自己心死，再見了！」
之前俾狗主響朵話要刮佢出嚟嘅「藍鳳凰」，就話狗主同「泛民」大和解，代表佢過去幾十年只係喺度行騙，又寸狗主班「教徒」雙重標準，喺度用「同邊個食飯要你管呀」、「唔同政黨就唔可以一齊食飯呀」、「同咩人合照關你鬼事呀」等等理由幫狗主兜，「既然係咁，咁你黃毓民同班『教徒』『益友』當日憑咩鬧葉政淳夫婦同黃洋達夫婦打邊爐？同邊個食飯要你班友管呀？唔同政黨就唔可以一齊食飯呀？同咩人合照關你班友鬼事呀？唔係公共性，私人飯敍唔得呀？當敍舊唔畀呀？你班友限制人哋交友權呀？食餐飯就一定係有密謀呀？你黃毓民憑咩鬧人反骨仔？」
神駒護主反擊 批四眼變色龍
狗主俾「狗」咬，神駒係時候救駕嘞：「鄭錦滿呢啲×人真係賤×到無人有，完全係封閉式邪教思維。毓民已經一早表明，MyRadio台慶係只談風月，不談政治，有唔同黨派嘅嘉賓到場，係好正常嘅事。」神駒仲鬧四眼口口聲聲「擁抱黃毓民主義」，但之後變咗擁抱「熱狗」過氣「首領」狗達（黃洋達），利慾薰心，「你不要再自稱『義士』來侮辱這個稱號了，你只是一個連上庭都遲到，還在法庭上玩手機，被法官質疑沒有真誠歉意而判監的廢人。」
■香港文匯報記者 陳庭佳