馬會上周發出聲明，隨住澳洲農業及水資源署新政策落實十月二日起將暫停所有來自香港嘅馬匹進口，換言之香港賽駒日後將唔能夠遠征澳洲、退役後亦唔可以運往當地頣養天年，同時澳洲賽駒亦唔能夠來港出賽，呢個消息對於兩地馬壇嚟講都非常震撼。先睇澳洲代表馬方面，雖然佢哋近年來港參戰馬唔算太多，不過「模範駒」、「尚多湖」（圖1號）等來港都取得不俗成績，如今搶錢大計暫時停頓，都咪話唔慘；至於一班本地代表亦議論紛紛，唔少練馬師都話冇咗隊勁敵，當然有助主隊增加大賽奪冠把握，不過亦有人擔心將會有其他國家如鄰近的新西蘭，甚至歐洲、美國，跟澳洲有馬匹往來的地區，將會仿效澳洲推出限制，到時唔止令來港出賽海外賽駒大為減少，香港賽駒亦冇得自由遠征海外賽事，澳洲新政呢一石到底激起幾重浪，呢一刻好難估計，不過相信班練馬師覺得點矛盾都唔會及得大摩，因為雖然大賽或者少咗幾個對手，但盃王從練想帶馬返家鄉贏一級賽嘅悲願，暫時都應該好難達成喇。
另一邊廂，澳洲馬后「雲絲仙子」在蘭域馬場挑戰廿連勝成功，作為目前全球評分最高嘅草地賽駒，「雲絲仙子」近年一舉一動備受矚目，上周六就喺蘭域馬場出戰千六米一級賽佐治文斯錦標，結果此匹馬后今次既無漏閘，彎位唔算落後極遠，最終順利擊敗藍營高多芬旗下嘅「高興崇拜」取得廿連勝佳績。根據外電報道，騎師布文賽後話能夠成為「雲絲仙子」鞍上人感到非常榮幸，而練馬師華禮納就覺得場地偏硬同快，因此呢匹馬后喺賽事中造出一分三十三秒六五的極速，練者亦透露會安排「雲絲仙子」再跑多一場，然後會挑戰覺士盾三連霸。同日在澳洲贏馬的有二○一五年香港經典盃跑獲亞軍嘅「精彩鬥士」，最終因傷結束在港競賽生涯。不過，呢匹公認質素唔錯嘅馬轉往澳洲發展兼交由希斯訓練後竟然浴火重生，三月於千二米一級賽新市場讓賽掄元，抖四個月後「精彩鬥士」上周六喺費明頓馬場復出跑千二米二級賽，結果輕取對手兩個半馬位姿態輕鬆，既然「精彩鬥士」縮程跑短途威力咁大，難怪希斯有意讓呢匹馬出戰總獎金達一千萬澳元的千二米一級賽珠穆朗瑪峰錦標，不過，除「精彩鬥士」外，希斯亦有三戰全勝Vega Magic出賽，究竟到時由邊匹希斯訓練嘅馬代表角逐首屆珠穆朗瑪峰錦標，稍後時間應有答案。