■譚凱邦刪咗呢個咁有霸氣嘅post，好彩有截圖。 fb截圖林鄭嘅新一份施政報告下月就出爐，唔少黨派都提出建議，尤其係房屋方面，其中白鴿黨（民主黨）立法會議員奸人堅（尹兆堅）前日就話可以喺馬灣起貨櫃屋，但話咁快就俾同道ban橋（反對建議）嘞。喺馬灣做區議員嘅「新民主同盟」譚凱邦，一聽到要郁到佢「地盤」，條氣梗係唔順啦，又話馬灣交通頂唔順，又話打風驚吹冧晒，寸奸人堅唔經大腦，「膠都廢事派」，不過俾奸人堅話返佢仲快過啲發展商企出嚟反對。好哋哋一個民生建議，就咁俾反對派膠化成網上口水戰。譚凱邦更加當正自己係馬灣「島主」，一度叫反對派「唔好自把自為」，有乜關於馬灣嘅建議同佢單聲先，但唔知係咪笠水，個post（帖文）喺噚日刪咗。
尹倡起組合屋 譚譏無腦
奸人堅前日喺立法會開記者會，建議可以喺閒置土地或者校舍起「臨時組合屋」，仲提出兩幅閒置地有條件做試點，一幅係無雷公咁遠嘅迪士尼二期，另一幅就喺馬灣，就因為咁而辣㷫咗譚凱邦。
譚凱邦當晚喺facebook反擊，話馬灣嗰幅地本來都諗住起私樓，但居民覺得當區交通會頂唔順而普遍反對，又話幅地涉及斜坡、打風唔知點算等，覺得起貨櫃屋唔可行，仲寸奸人堅條橋劣質，唔經大腦，無做好資料搜集，「身為新界西的議員，應了解上述情況。或者應該尊重下（吓）當區議員，問吓我囉。」
個post最後仲加咗「膠都廢事派」、「最佳方法當然係減單程證」兩個hashtag（標籤），火藥味濃。
島主上身叫同道先問佢
奸人堅抵唔住頸，喺幾個鐘之後即刻出post反駁，話自己提議嘅係起「預製件組合屋」，材料、外觀、配置都好過其他臨時房屋，就唔係好似譚凱邦想像嘅貨櫃屋，唔怕打風或者斜坡等技術問題，而且自己提到嘅馬灣只係適當用地之一，唔係話鐵定落實，仲叫馬灣街坊睇晒資料先再思考，「唔好畀（俾）人撥兩嘢就點到你暈呀。」
人玩hashtag佢都識玩，寸人哋「睇建議但又唔睇具體內容就嘈」、「我預咗大地產商會嘈估唔到有人更快」。
罵戰去到前晚深夜都仲未肯停，譚凱邦再出post質疑奸人堅點解咁多幅地淨係提馬灣，又翻炒馬灣啲交通問題，好似巴士班次唔穩定同加價等，要求身為新界西立法會議員嘅奸人堅「高抬貴手」，唔好再為馬灣居民添煩。
佢仲將房屋問題同家庭團聚兩樣嘢扯埋嚟講，聲稱「房屋問題源頭就係單程證，要減單程證名額」喎。
譚凱邦前晚更加一度馬灣「島主」上身，出咗個咁嘅post：「我講明，請任何『泛民』或『本土』朋友，如果有爭議的議題關於馬灣，請先和我商量，唔好自把自為，提出欠缺常識的建議！」
嘩，好大嘅官威！不過，唔知佢係咪覺得霸氣盡露無乜好處，個post去到噚日就唔見咗嚕。 ■香港文匯報記者 陳庭佳