方嘉柏一向以谷戰成績較佳，而今季所取得的三場頭馬，其中兩場是出自谷戰，而今次夜賽八場賽事中，馬房出足八駒，唔少場合均用到大師傅替旗下馬匹披甲，如潘頓「愛樂寶」及雷神「隨時候命」，都是擺明車馬之出擊分子，馬房近期更替三駒準備好出擊計劃，「愛樂寶」是其一，還有羅理雅之「勢必跑」及潘明輝的「喜盈盈」（圖前駒），至於雷神之「隨時候命」，上場開氣後勇態有增無減，有機會是第二匹「超然」，因為季內雷神肯再騎由他熱過身之馬，必有見地。
季初練馬師替「喜盈盈」出戰過場一千米直路賽，交由何澤堯披甲，賽前不少馬房手足都認為此駒水準已經不差，但百思不得其解，為何倉主要替牠跑田戰盲門路程，有心水清手足幫呢隻馬查過，八次田戰全不入三甲，這次是第九次跑田戰，至於跑一千米直路賽是第三次，所以唔敢點對呢隻馬有信心，不過又好奇怪，隔晚呢隻馬僅得十三倍，到正式出賽當日才回飛，當然咁嘅賠率，亦反映幕後信心越來越薄弱，雖然票數信心軟弱，但何澤堯跑回一席第五名，表現未算太差，亦可以解釋到點解呢隻馬隔晚賠率係一隻有飛馬。
「喜盈盈」跑完呢場熱身賽後，馬房今次急急同匹馬報番谷草千二米，此程正係唯一贏過嘅路程，馬房希望跑番食胡路程能一擊即中，所以倉主一早經已搵人向賀賢借將，今次「喜盈盈」用上有七磅可減嘅潘明輝出戰，已屆及鋒而試時候。
羅理雅炒起勢必跑
至於由羅理雅披甲嗰隻「勢必跑」，今次出爭三戰得兩冠嘅谷草一哩，相信係出擊時候，而呢匹馬嘅部署手法，與「喜盈盈」十分相似，季初所出戰賽事並非呢隻馬擅長路程，呢場就係田草千四米，未交由羅理雅跑呢場前，經已跑過六次同程，全無三甲成績，咁即係又想用來熱身，難得呢場羅理雅知道冇機會，但一樣肯當呢隻馬主帥列陣，志在一心一意替馬房仄馬匹進度，結果後衝得第六名，輸俾頭馬「綠勇士」一位一，假如呢場唔係跑千四米，是跑千六米經已有機會取勝，馬房穩陣起見，仄一仄近態如何，證明隻馬季初狀態唔差，於是馬房急急安排呢隻馬跑番最拿手谷草一哩，過往亦有兩冠紀錄，與田草千六米一樣具相當威力，所以今次應是「勢必跑」表演的時候。
愛樂寶方廄變倍器
出戰第八場三班千二米之「愛樂寶」，呢個路程兩戰得一冠一殿，今季一出馬房即替牠出戰拿手路程，並用上潘頓披甲，擺明車馬搏殺格，而早喺八月份經已由潘頓過檔替牠彈過課大閘，走勢已不錯，今次終有機會上陣，當然亦是馬房出擊棋子之一。其實，馬房於九月二十日已替「愛樂寶」報名跑谷草千二米，幕後亦驚此駒未能獲得正選出賽權，於是用上王牌報名，誰不知「愛樂寶」即使用王牌報名，最終亦只能列為第一後備未能補出，結果該仗的頭馬是「狀元才」，「愛樂寶」未能列陣是禍是福難預料，但肯定是多了一周作準備，今次幕後有信心可以替這駒爭好成績。