今次夜賽蘇保羅有匹遲熟馬「友瑩采」列陣，上季隻馬喺五班田草千八米由潘頓取勝，贏完後升回四班，在季尾最後一戰換上祈普敦未能好好掌握馬性，最終只得第五名，整季只贏得一場。
「友瑩采」上季未能打疊贏馬，只因鞍上人錯失良機，今季馬房計劃大展拳腳，連續三次交韋達上陣，當中只取得一次第三及一次第四名，不過，最令幕後不滿係有場跑泥地一哩，幕後原本以為韋達會留守好位衝，誰不知竟然留到後一後。所以最近一仗幕後寧願換上黃皓楠操刀，當然，呢隻馬所有上名同勝出騎師都係大師傅，贏馬一役用潘頓，入位有韋達及祈普敦，最近一仗轉用黃皓楠，呢個組合可以話第一次，所用嘅戰術係沿途均速快放，結果頂到最後幾十米先至俾「開懷大少」、「喜盈運」及「共創更好」越過，最後輸四分三馬位得一席梗頸四，呢一席第四名黃皓楠帶領得有聲有色，經已令幕後收貨，起碼全程都有胡叫，並唔係前次韋達留得後一後連衝都冇得衝。不過，事後睇番黃皓楠嘅發揮，若唔係用放領戰術，而係用番「友瑩采」贏馬最佳戰略留前鬥後，呢一仗應該有贏馬嘅機會，因為從過往三次上名嘅走勢所見，田草千八米由潘頓開齋一役，其走位係7 7 4 1，其餘三次入位，也是從後鏟入位置，當然這次放頭跑，幕後志在仄一仄馬匹季內狀態是否已達爭勝水準，黃皓楠此戰經已證明「友瑩采」有勇態。今次馬房安排隻馬出戰谷草千八米，同程曾喺季內由韋達拚入一席第三名，贏牠的兩駒，分別係「榮冠大道」及「勁有波幅」，兩者均是四班中長途好手，後者曾上到三班依然可以上名，計數今次跑谷草千八米嘅「友瑩采」，假如鞍上人楊明綸用回適合戰術，憑負磅輕飄飄情況下，絕對有本錢重啟勝利大門。