■慢必在fb話要「還原真相」。 陳志全fb截圖立法會在周三開始審議1,131億元臨時撥款決議案，當日傾唔完結果要周四上晝續會繼續傾，點知反對派議員僅1人在會議廳，其他全部冇到，連此前聲言要在審議臨時撥款時拉布迫政府修改財政預算案的慢必（陳志全）同朱隊友（朱凱廸）都唔喺度，即刻成為眾矢之的。陳志全就發帖開脫，話每個人只可以發言一次，自己周三已經發過言，周四喺唔喺度都冇辦法拖延喎，被鬧爆佢轉移視線，話如果佢喺度可以點人數，就可以造成「流會」。朱隊友則聲稱自己當時接受緊電話訪問所以冇為意，被揶揄「沒有鏡頭哪會蒲頭」，唔怪得蟲炎（姚松炎）會喺補選中落敗咁話。
反對派阻撓通過臨時撥款決議案失敗，其實係一件好事，但班反對派支持者就梗係唔happy，對佢哋群起而攻啦！為免火燒身，當日遲到嘅慢必就發帖話要「還原真相」，稱每名議員在決議案只能發言一次，而自己已在周三辯論首日第一個發言。
在周四上午9時續會，他辯稱以為仲會有排傾，結果「沒有其他議員要求發言」，主席就將臨時撥款議案付諸表決，「我九點前已回到立法會，最失策是沒有第一時間進入會議廳。不過，即使我在，也只能要求記名表決，不能再次發言。......我承諾日後即使只得我一票反對，定必致力確保重要議案能記名表決，並為此次失誤致歉。」
鬧遲到失點人數機會
講到尾，即係唔關佢事，而係其他不在場冇發言嘅議員嘅責任啦！唔少慢必嘅支持者將矛頭直指「收咗3萬」嘅民主黨，同「關鍵一席」、公民黨黨魁楊岳橋（表一）。不過，都有唔少「黃絲」話佢係轉移視線，質問佢話當時會議廳只得8個人，只要佢唔遲到並即刻叫點人數，就可以搞到「流會」（表二）。
咁朱隊友呢？佢鬼鬼祟祟喺fb留言區度話自己當時接受緊電話訪問喎。唔少人揶揄佢，仲回帶話有呢個「朱頭軍師」，唔怪得蟲炎會喺九龍西補選中落敗喎（表三）。
其實，都係你班「黃絲」天真啫，你以為佢把口講嘅就真係佢心裡面諗嘅、身體會走去做嘅咩，好似佢哋口講民主，但咪又要迫到跟反對派「初選」機制嘅馮檢基連「Plan B」都冇得做！
■香港文匯報記者 陳川