■毛婆喺fb抽水，重提佢要求放寬公屋養狗嘅規定，否則就會造成棄養喎。 fb圖片銀狐犬「小白」慘死，引發全港市民對動物權益的關注。「議會陣線」立法會議員毛婆（毛孟靜）諗住乘勢抽水，喺fb重提佢要求放寬公屋養狗嘅規定，否則就會造成棄養喎！不過，佢竟然喺自己個同溫層俾人圍攻，話住公屋第一日就已經知道不能養狗，夾硬養唔喺愛狗而係害狗，仲質疑毛婆係為咗選票而盲撐，有人更質疑佢只顧動物權益，唔顧市民嘅居住權。
毛婆近日借住市民關心動物權益，將佢以前要求放寬公屋養狗嘅舊聞上載fb，仲將愛護動物協會擺上枱，話公屋唔准養狗會搞到棄養。不過，唔少網民就好唔buy佢嘅講法嘞。
網民：本末倒置損法治
「Yan Lai」就批評毛婆本末倒置：「養狗唔係錯，但入住前列明不能養而硬要養， 然後又話趕佢走係等如奪走小生命， 到底是誰先錯？ 你明知顧（故）犯仲大大聲嘈唔人道， 是誰先不人道？......如果個個都有法不依， 咁要法例做乜嘢？ 如果樣樣都可以因自私的理由去方（放）寬， 咁就唔係法治，係人治。」
「Kant Leung」亦道：「規矩就係規矩，如果因為養狗人多左（咗）就要放寬，咁食草（大麻）係咪都可以放寬好似美國咁？藏槍係咪又應該？」「Timothy Yuen」就話：「我實難以同意公屋居民養狗。環境不合，實是虐待狗兒！」
「Eric Mo」就直接攞毛婆自己養嗰兩隻狗「孖寶」嚟講：「問下（吓）孖寶住公屋好唔好。別為選票而盲撐。......香港已好多狗長期困在家。已唔計班無修養嘅人畀狗周圍痾（屙）。自己去公屋視察吓，只會令無養狗人更憎狗。」
害狗唔顧人被鬧爆
「Galant Tuv」也揶揄：「毛議員住屋大，唔多使返12個鐘夜班，又未見過pk狗主。我屋企之前附近就有狗，朝朝天一光就狂吠。狗主又搞唔掂隻狗。......幼稚園都教，養寵物前要考慮同了解清楚。可惜好多人（連）幼稚園小朋友都不如。」
眼見「群情洶湧」，毛婆難當睇唔到，只得死撐話要求讓公屋戶養狗，只會失選票，所以她只是期望「放寬一點」，「譬如說，可否第一步考慮放寬精神支柱的定義，又或者所有不超過12磅的小狗品種不必申請都可以養。」
「Icee Hu」就寸爆佢：「我真係想知道，如果有人嘅精神支柱係隻豬，係一竇雞，又點？你只為狗主爭取？」
「Galant Tuv」則質疑：「幾小算小狗？用尺寸定狗種來定？管理處、業主立案法團邊個負責審批？用尺寸定，養時小狗，養大左（咗）點？狗種，邊個去出鑑定？雜種狗又養唔養得？小狗，松鼠狗嘈過德國軍犬。唔咬人，一年俾細狗咬的人，一定多過金毛尋回犬。」
「Sandy Sand」就「好言相勸」：「有人排隊等上公屋，排極唔到，排到又可能係時候住醫院或老人院。毛議員在立法會係超勁好，......不如集中火力，先focus解決人類住屋問題！」「Choi Yuet May」就冇咁客氣：「正常野（嘢）唔見你爭取，呢啲野（嘢）就咁努力！我地（哋）香港人幾多人無屋住你唔理，我地（哋）既（嘅）精神支柱就係希望有正常價既（嘅）屋住！」
■香港文匯報記者 陳川