■反對派8票「倒戈」，鴿黨3人缺席。反對派近期炒作區議會授權票問題，話人唔開會白收人工喎，咁反對派議員成日缺席立法會會議，又算係點呢？立法會工務小組委員會早幾日審議興建機場第三跑設施48億元撥款項目，一直反對嘅民主黨就有3個人缺席投票，而成個反對派仲有8票「倒戈」，而且連交代都冇句，又算係點呢？
「獨」師批3鴿缺席投票
中文大學「獨」講師劉正又辣更，昨日發帖話曾經「好憤怒咁刊登」聲明話反對興建三跑，但當政府將三跑興建設施撥款建制提交工務小組表決，民主黨的胡志偉、許智峯、尹兆堅「再次逃避議事責任缺席投票」。
佢仲話，民主黨嘅黃碧雲、林卓廷、鄺俊宇，及公民黨嘅楊岳橋、譚文豪、郭家麒、陳淑莊，再加埋「IT走狗莫乃光」共8票，「竟然倒戈支持政府議案」：「我心諗你地（哋）當初唔係全部都反三跑架（㗎）咩？點解今時今日竟然可以出賣市民，企咗響建制果（嗰）邊？」
劉正續稱：「如果8名倒戈嘅公民黨民主黨莫乃光重新企番（返）響市民一邊投番（返）反對票，咁呢個議案經已由24：7變番16：15，而胡志偉許智峯尹兆堅有盡責出席投票，咁議案就會以18：17被否決。但現實就係因為『飯民』再一次出賣選民，令立法會議員反勝為敗。」
同「獨」人唔同，一般人睇呢次項目通過，反對派議員都算得上係「做咗一件好事」嘅！不過，講反對講到咬牙切齒，到投票時就經常失蹤，咁就真係背棄自己選民之舉啦，呢種人仲點信得過？ ■香港文匯報記者 陳川
