講近期成績最好馬房，當然要講告東尼，上周日以「加州福星」及「加州再豫」起個孖寶，而當中「加州福星」更捧走回歸盃，有心水清馬迷幫告東尼馬房計過數，自五月份起，呢個倉經已第十二度捧盃，正係旺到你唔信。跑馬屬偏門，要跟紅頂白，近期告東尼馬房旺過旺角，今次夜賽，東廄成手馬都惡氣十足，又有數糊本錢。練馬師喺周一排位日一早出現馬房監督，當朝有三匹戰馬專登安排喺馬房地堂踱步，倉主在場細心觀察，呢三隻戰馬計是「勇敢傳說」、「巴基小子」及「帝聖寶貝」（圖前駒）。馬房該朝安排「勇敢傳說」何澤堯、「巴基小子」湯智傑及「帝聖寶貝」副練巫偉傑三匹馬於地堂列隊走花蹄踱步，當三隻馬踱步完畢，倉主逐隻摸腳，動態非常緊張。
「帝聖寶貝」季內曾由李寶利跑田草千二米爆冷，之後因為再搵唔到適合賽程，曾經兩次喺泥地千二米出擊，性能唔啱發揮下，連前速亦欠奉，所以近兩仗陣上表現均是平平無奇；今次馬房安排匹馬跑谷草一千米，雖然呢個路程並唔係最佳出路，但因為近期狀態經已操起咗，所以馬房希望把握今季餘下每一個機會，盡量替呢隻馬再贏頭馬，當然最壞打算便是跑煞科日最後一場五班田草千二米，不過預計今場已會出擊拚勝。
巴基小子降班即郁
至於「巴基小子」，季內喺三班賽亦有位置交出，算是一匹三班不足，四班有餘之馬，而季內曾經喺四班贏過場谷草千二米，鞍上人屬沈拿，該場排十檔起步，騎者似乎知道呢隻馬有多少班底，一起步便狂搶，結果一放到底贏馬，足見幕後相當清楚呢隻馬嘅實力。今次「巴基小子」落番四班跑，用近期合作如魚得水嘅何澤堯，隨時又入凱旋門威威。
勇敢傳說連捷機高
講開何澤堯，告東尼可以話錫到佢燶，好多要交代奇難雜症馬，操好交俾佢手上，通常都有唔錯效果，「友情人」及「勇敢傳說」呢兩隻馬都十分難贏，結果最近都俾何澤堯收服咗，今次「勇敢傳說」再由何澤堯操刀，睇佢上次贏谷草一哩，末段衝拉士三百米如入無人之境，馬房徹底打造到呢隻為一哩馬，再唔係好似以前咁，以為跑短途最好。「勇敢傳說」今次雖然排十二檔起步，但其實呢隻馬排外檔仲好跑，容易搵生位衝，好過排一檔，由主動變被動，到時入直路搵位出，可能要考何澤堯嘅機智及膽識，所以今戰連捷機會十分樂觀。
悅目星光雷公鑿弗
今次徐雨石戰馬也不能夠忽視，據馬房手足所講，近期打料師非常忙碌，原來佢接到柯打，季尾呢幾次賽事所有戰馬都要刻意催谷，希望收季前再衝多一輪成績，以今次賽事為例，就以「悅目星光」及「雷公鑿」操得最行，飼料加重金山大麥外，呢一對馬埋門前幾日都好似孖公仔咁，朝騎晚踱十分認真，有時更齊齊游水兼且照太陽燈，兩駒今次皆出戰合適路程，有機會替馬房增添頭馬紀錄。