■杜振豪開腔撐尖沙咀表演者，隨即惹來同路人圍插。fb截圖旺角菜街自從殺街收檔後，一眾表演者轉攻尖沙咀碼頭，咁又引起反對派之間嘅鬼打鬼啦。多數反對派見到班大媽，當然就破口大罵啦，「獨派」都乘機講咩「中國人」、「香港人」等等，但社民連常委、職工盟幹事杜振豪就喺facebook度出文反問︰「如果你係真心撐小販，點解會唔撐這些街頭歌舞？」咁講又好似符合返反對派之前嘅行為準則喎，咪係囉，唔好輸打贏要先得㗎。
稱欣賞表演者活潑飛揚
班表演者嚴重推高尖沙咀嘅聲浪分貝固然係事實，不過見到一班人踩到人地底泥咁，仲話班表演者係「歌妓」，杜振豪就睇唔過眼，出聲維護班表演者，話班人有偏見先覺得人哋係「大媽」，仲好有愛咁話自己「看到活潑的基層文化，看到輕舞飛揚的獨立女性」，真係隔住個mon都感受到無懼俗世眼光嘅愛呀。
杜振豪又大讚佢哋「有人自發組織，有擁躉有收入，可以持續經營，幾多民間團體一直想搞的社區文化活動及社區經濟，都搞唔到呢個規模」，仲反問佢班反對派戰友：「如果你係真心撐小販，點解會唔撐這些街頭歌舞。」大媽又好小販又好，喺杜振豪眼中都係基層啫，打和！
不過，大家都知唔跟「民主派」大隊係咩下場，咪就係俾成班同路人圍插囉。「黃絲」攝影師「林健恆」鬧佢離地：「佢哋真真正正就係影響市容同埋嘈（噪）音污染，已經係一個佔多數的共識，即係我覺得你會唔會考慮下落地接觸下主流到底諗梗（緊）咩而唔係單純只係得自己套理念？」
Cheap禎Plan B質疑混淆視聽
被視為Cheap禎（游蕙禎）Plan B嘅袁健恩就覺得杜振豪根本唔知班表演者係中產定基層，質疑佢喺度混淆視聽：「何以見得『大媽』係基層呢？佢地（哋）係（喺）行人專用區入面係資本家黎（嚟）喎，佢地（哋）正正係有鴻（雄）厚資本『音響』去剝削緊其他表演者。」
網民「Jesper Mok」就覺得杜振豪係「大愛膠講大道理」，唔理班耳仔受罪嘅當區人：「唔好因為要堅守左翼原則而講埋一啲掩耳盜鈴嘅道理啦！」「林藹雲」就話佢偷換概念：「小販同歌舞有質的不同，若小販開擴音機我都反對，小販係清潔及食物衛生上的問題。」
一個抒發自己見解嘅post，咁就挑起一班同路人罵戰足幾日幾夜。不過，反對派係咁㗎啦，好出奇呀？ ■香港文匯報記者 何西