■「熱青城」整咗幾幅低質改圖寸陳浩天，話佢答外媒問時唔知講咩。 fb圖片港姐最好睇係乜嘢環節？有人覺得係首圈面試，睇吓啲女士可以有自信成點，有人就認為係佳麗着住泳裝接受司儀提問，可以睇到佢哋露底咁話。嗱，唔好心邪，講緊嘅係知識方面，皆因啲佳麗嘅答案好多時都係九唔搭七！「香港民族黨」召集人陳浩天日前接受美國《時代雜誌》訪問時，一樣俾人問到口啞，一直睇陳浩天唔順眼嘅「熱青城」就整咗幾幅「小畫家式」改圖，夾硬將陳浩天個頭key落去個泳裝佳麗度，手工就爭啲嘞，不過夠應景！
傻根改圖暗寸九唔搭八
「青城派國師」傻根（陳云根）噚日喺facebook些牙（分享）咗幾幅改圖，陳浩天變咗一個泳裝佳麗，而「獎門人」志偉哥就由司儀變咗《時代》記者，好似問到陳浩天係邊個喺政治上啟蒙到佢、「港獨」願景等，陳浩天就答都唔曉答，問佢香港族群、歷史、文化等等，佢就答咗「唔知呀」、「香港是我家」，完全係畀《時代》嗰啲答案。
傻根話陳浩天畀啲咁嘅答案人，就連港姐都入唔到圍。「Chan Joe」就覺得陳浩天咁樣「蠢出國際」，就好似話畀人聽「港獨」等於「戇×」、低能、無知、「傻×」，倒晒成個米缸啲米。更加有啲「熱青城」中人覺得，睇完陳浩天播「獨」唔成仲成為國際笑話，越睇越覺得佢似《喜劇之王》個甜筒輝，或者係《食神》入面好Richard吓嗰個Richard！
■香港文匯報記者 陳庭佳