所謂馬路如虎口，過馬路一定要小心，特別係遇到立法會九龍西補選候選人李卓人個宣傳團體嘅時候。「神駒」仇思達昨日喺fb上載咗一段由益友提供嘅車cam片段，影住李卓人嘅宣傳車竟然喺深水埗衝紅燈。「神駒」就強烈譴責李卓人嘅選舉團隊無視交通燈號，視人命如草芥。
「神駒」喺fb發帖話，劉小麗同李卓人嘅選舉宣傳車，昨日被踢爆公然違法亂衝紅燈，漠視其他道路使用者安全，「事發在今（昨）午三時二十分，一輛劉小麗和李卓人的宣傳車，於深水埗福榮街轉出南昌街位置，無視交通燈號，儼如『馬路炸彈』！ 強烈譴責李卓人（Lee Cheuk Yan）視人命如草芥！」
「停住先」再衝 擺明有心
根據「神駒」上載、由益友提供嘅短片，見到大大隻字「劉小麗」、細細隻字「李卓人」嘅選舉宣傳車，路口嘅燈位已經轉咗紅燈，但架車停低咗6秒然後就衝燈轉彎，明顯唔係無心之失，而係有意為之啦！
「益友」紛紛留言批評兼揶揄。「Marco Luk」直指：「李卓人劉小麗草菅人命！」「Milk Tea」亦批評：「好×霸道吓。李卓人搞選舉工程就可以無視交通安全。」
「馬不停蹄守護違法特權」
「Choi Wai Hung」就攞李卓人近日話自己「馬不停蹄」落區嚟玩：「果然係馬不停蹄！」「King To Leung」就話：「民主不包括衝紅燈和漠視人命安全的特權！」佢仲標註埋「守護衝紅燈的特權」等句。
「Leung Tak Man」揶揄道：「由民主霸權做到馬路霸權。」「Enoch Hui」更質問劉小麗及李卓人：「出咗人命佢班×樣係咪當冇事照走呀？」「HF Lam」就揶揄：「（死者）獲肥佬黎追封為民主而戰死嘅最高榮譽烈士，其家人一世免費睇蘋果日報網上版。」
立法會九龍西補選候選人還包括陳凱欣、馮檢基、伍迪希、曾麗文。
■香港文匯報記者 陳川