最後一宗「佔旺」刑事藐視法庭案前日判刑，估唔到都會炒出花生。社民連嘅長毛（梁國雄）喺案件宣判後話，唯一一個要受靶嘅係73歲嘅露宿者劉鐵民，但由於負責單案嘅事務律師伍展邦阻撓，令劉鐵民最後冇得保釋等候上訴，而要即時入獄咁話。社民連嘅廢陶就加把口，話自己一早聽聞過伍展邦嘅「作風」，「不敢苟同。」伍展邦就話，成件事實在唔關佢事喎。
話說代表劉鐵民嘅事務律師伍展邦，係公民黨成員，同時喺DQ案、旺角暴動案、「佔中」九男女案、佔旺刑事藐視法庭案、「一地兩檢」的司法覆核等政治案件中都係律師團隊成員，喺接受傳媒訪問時仲講過話自己要投放心神做「蝕錢」嘅案件，係「想幫人」，「守住法治最後一道防線」喎。
不過，長毛就喺前日發帖，向伍展邦開火。佢話，劉鐵民前日被判4個月即時入獄，「個刑期其實算重，所以係可以上訴嘅。最重要係，上訴需時，所以如果唔申請保釋嘅話，佢要係監獄入面等上訴，話唔埋要坐一兩個月先會正式上庭上訴。」
口噏保釋事 意在捅訟黨
佢跟住話，劉鐵民嘅事務律師伍展邦當時無喺法庭出現，劉鐵民於是希望其他在場嘅事務律師包括王學今幫佢免費緊急申請保釋，等佢唔使即時坐監，等候上訴。
而佢嘅代表大律師、身為反對派法律界選委嘅黃宇逸，同在場代表其他被告嘅潘熙資深大律師及另一位大律師都話肯免費代表佢，仲即刻為佢去上訴庭申請保釋。
長毛話，黃宇逸其後準備好晒所有文件，正準備入文件畀法庭之際，伍展邦「忽然出現，煞停班律師」，「佢話自己走咗落去監房搵劉生簽咗一份授權書，該授權書顯示劉先生寧願坐監都唔要呢一班免費律師幫佢手。伍展邦並向一眾律師出示個張授權書同埋同佢地（哋）講你地（哋）已經被我取代左（咗），唔須（需）要你地（哋）代表劉先生。」
佢最後話：「既然伍展邦咁堅持，王律師潘大狀黃大狀無奈同失望地離開左（咗）。之後法庭時間已經過咗，已經冇可能幫佢做緊急保釋，劉生要即刻坐監。」
廢陶就喺長毛fb留言話：「佢D（啲）作風，一早聽聞，不敢苟同，究竟喺為當事人着想，定搶生意呀？！」自稱「自由身攝影師」嘅林健恆亦狠批：「為個人面子同利益，唔顧客戶利益，搞到保釋唔切，完全係違反作為律師既（嘅）職業操守。」
林健恆話：「伯伯（劉鐵民）一向係響當區露宿，無故上庭被判刑已經又驚又慘，仲要俾伍展邦你咁樣唔出現又倒打幫手既（嘅）戰友，真心憤怒！公民黨出黎（嚟）講兩句啦，你d（啲）黨員黎（嚟）。」
伍展邦講程序 暗指黃爭食
伍展邦其後回應長毛的帖文，話申請保釋等候上訴需要在上訴法庭作出，「同案的黃之鋒及黃浩銘向上訴庭作出的保釋申請均不是即日聆訊，......即使今（前）天有律師能把所有文件呈交法庭，劉先生能在今（前）天在上訴庭成功作出有關申請的可能性依然不大。」
佢仲話，其律師行現已指示為劉鐵民作出保釋等候上訴的申請，亦已找到大律師義務協助，「本行亦絕不會就此次申請作出任何收費，有關工作現已全速進行。」
伍展邦仲暗示，今次呢壇嘢，係黃宇逸「從中作梗」：「當從本行職員得知黃宇逸大律師在法庭內拒絕給我行事務律師判決書時，我馬上由金鐘法援署趕到高等法院查探原因。我對黃大律師不給予判決書給我行律師這個行為實在不能理解。」
喺呢件事上，大家信邊個？我就話兩邊都唔使信住，只需買定花生等睇戲。
■香港文匯報記者 陳川