今次夜賽雖然是一次普通谷戰，但是對兩位公司騎師來說，是爭取下月初國際騎師賽的參戰資格之最後機會，港隊四個席位之中，潘頓、田泰安及何澤堯經已鐵定獲得參賽權，尚有餘下一個席位，便是由潘明輝、韋達及史卓豐之爭，不過獲十四場頭馬的潘明輝正值停賽，而韋達及史卓豐今季頭馬各為十三場，今次夜賽誰能領先，便獲得最後的參賽權。
今次夜賽韋達與史卓豐兩者皆騎五場非常公道，所以，兩者的實力馬鬥志必定旺盛，史卓豐牌面稍稍高一些，新勝坐騎「龍騰摘星」，贏馬後馬房一樣準備積極，動態依然有打硬仗決心。喺周一排位朝苗太替「龍騰摘星」於地堂踱步，同一時間馬房多安排一匹戰馬「龍城猛將」由副練拍踱作伴，兩駒踱步完畢又再教閘，埋門動態緊張。
當「龍騰摘星」及「龍城猛將」所有工夫做妥後，倉主特別吩咐工作人員，下午要把「龍騰摘星」送往獸醫房照鼻及抽血檢查，通常抽血及照鼻都會測出其狀態進展如何，據悉，倉主睇完報告後覺得一切滿意，相信這匹實力分子是史卓豐爭取國際騎師錦標賽入場券的主要籌碼。
合拍威龍如箭在弦
至於韋達手上五駒，實力並不覺得突出，希望有幸運之神眷顧，因為兩匹稍具爭勝希望的馬「合拍威龍」及「肥仔」，跑法都是被動型，兩駒均排二檔，檔就靚晒，可惜兩駒性能均只宜後追，睇十三少屆時點樣楔位出盡渾身解數，必搏盡爭取成績。
陽明亮亮福威勝弗
講完今晚賽事大家要注意嘅騎師外，有一位練馬師仁兄值得推介俾大家留意一下，佢就係呂健威，佢雖然唔係今季谷戰勝出率最高練馬師，最高係丁冠豪馬房，有24%，將近每跑四場就有一場頭馬，上名率亦有45%，接近一半咁滯。不過仲有個馬房上名率高過丁冠豪，呢個就係呂健威，上名率達47%，因此，照呢個數據去推論，今晚呂健威個倉所派出五匹戰馬，必有兩至三隻上名或勝出。
周一排位朝早上，呂廄只安排三隻戰馬於地堂踱步，由陳志忠太太，現時是呂健威馬房領班，監督住呢三隻戰馬踱步，分別為「陽明亮亮」華籍助手、「勁有波幅」余健誠及「福威勝」副練李新榮，三駒踱來都非常有睇頭。「陽明亮亮」馬房手足指出，近期下午無論行街或到機坪踱步，牠都會經常出現打蹄現象，此乃被大力催谷過的佳兆。至於「勁有波福」，近三仗都是跑得亞軍，臨門總是功虧一簣，近期經常由余健誠悉心訓練口勁收斂，相信今次跑一哩已有本錢一放到底取勝，值得再追一次。
副練李新榮經常摸實操練的「福威勝」，上次由何澤堯出戰谷草一哩經已殺聲震天，臨場僅是匹兩點七倍馬，可惜只得第二，今次刻意用上蘇兆輝，強配擺明車馬志切收復前失。呢匹團體馬戰意絕對鮮明，上次只是輸給一隻超三班惡馬「軍民歡」，今次用蘇兆輝跑，負磅又不重形勢是佔優，上述三匹呂廄馬，都是有機會替馬房增添頭馬紀錄者，值得捧場。