CY發帖叫林卓廷撐自己友 市民tag極都冇人應
民主黨成員林子健前年開記者會話自己喺旺角鬧市俾內地嘅「強力部門」所派嘅人「擄走」，當時民主黨幾個「大佬」，包括李柱銘、何俊仁，同身為立法會議員嘅林卓廷就齊齊撐場。結果呢，林子健被控一項「明知地向警務人員虛報有人犯罪」，林卓廷就即刻無咗影，包括喺近日法庭聆訊是案期間都冇到過場。全國政協副主席梁振英就發帖，叫林卓廷抽啲時間去支持吓林子健啦。有新界東居民更出「尋人帖」，叫佢唔好再潛水，但林卓廷就一直冇應機。 ■香港文匯報記者 陳川
林子健被控喺2017年向警員虛報在油麻地被擄走一案前日喺西九龍裁判法院開審。所謂臨時演員都要有職業道德㗎，當日陪同林子健搞記者會嘅何俊仁就有到庭旁聽，但同樣有去記者會嘅林卓廷就冇咗影。
事實上，喺林子健被踢爆懷疑講大話後，林卓廷就即刻劃清界線，一直唔肯再講呢單嘢。
梁振英就喺fb連發兩帖：「民主黨成員林子健被控2017年向警員虛報在油麻地被擄走，今（前日）早在西九龍裁判法院開審。『佔中』發起人之一戴耀廷及民主黨前主席何俊仁亦有到庭旁聽。當日坐在林子健身邊開記者會的林卓廷呢？......後（明）天續審，抽點時間去支持你相信的人吧！」
「昔日做兄弟 今日當契弟」
網民「陳龍飛」就留言：「林卓廷先生，希望你出庭為你的民主黨黨員（友）林子健作證明，當日記者會上的譴責，如果是事實，除非唔係。」「Rox Chan」就直言：「（林卓廷）最初諗住有得威第一時間衝出黎（嚟），而（𠵱）家衰咗就消（銷）聲匿跡，民主兄弟喎！」「Jennie Leung」亦話：「剩係識抽水，冇利用價值仲唔閃咩！」
有網民就認為，應該就是案追究埋林卓廷咁話。「Barry Ho 」問：「其實（警方）有冇向高大衰（林卓廷）進行調查，究竟當日件豬隊友第一時間搵佢時，有冇講真話？佢算唔算同謀？」「Ricky Yuen」更稱：「警方應該要控告他（林卓廷）一項教唆及串謀『明知地向警務人員虛報有人犯罪』。」
網民斥冇誠信 促控教唆串謀
林卓廷擔任議員嘅新界東，亦都有唔少居民睇唔過眼。喺「北區」fb專頁，「Peter Tse」就發帖「尋人」，帖文叫「六呎四（林卓廷）」，見字速與林子健聯絡喎。「Chu Chu」亦喺「上水人大聯盟」fb專頁發尋人帖。
唔少網民大鬧林卓廷潛水、冇誠信。「雷探長」留言揶揄：「有政治利益嘅時（候）佢就會撲出嚟，當冇任何政治利益嘅時候， 佢連自己老豆都可以唔認！」「Siu Wan LO」就好似好有感觸咁：「自從劉慧卿入咗（民主）黨之後，白鴿黨就已經日漸沒落啦， 遲早好似前線咁樣。」
林話閉門開會 唔通開成日？
林卓廷喺接受傳媒訪問時，就話自己當時出席緊立法會帳目委員會閉門會議，所以冇去法庭旁聽咁話喎。不過，單案審足一日，唔通阿林議員開會亦係開咗一日？「至於你信不信，我反正是不信了。」