豬年賀歲賽初三上演，唯一錦標賽係由第一班所角逐嘅賀年盃，雖然只得六隻馬跑，但實力接近，估計亦係一場非常緊湊嘅高班賽，而一隻賀年盃，其實引伸出兩個成功嘅故事，呢兩個故事均與現時嘅練馬師有關，一位係蔡約輸，另一位係羅富全。
先講一講呢個獎盃歷史，由一九九九年創辦，今年是第廿一屆，首屆係由愛倫馬房嘅「奔騰」奪得，但跑到第五屆，就由另一位當時眾馬迷對佢認識唔深嘅練馬師贏得，呢位就係蔡約翰，該季也係蔡約翰首季喺港開倉，而替佢贏得賀年盃係一匹未加盟蔡廄時，跑來跑去都贏唔到嘅「時代巨星」，該季呢隻馬一口氣勝出四場，包括贏埋賀年盃，蔡神仙呢個美譽，就係由此開始建立，一直流傳至今，呢個就係賀年盃其中嘅一個成功故事。
另一個成功故事，就係與羅富全有關，也即係蔡神仙嘅徒弟，上季呢個馬房開倉立萬，起初所得到嘅舊馬支持唔多，由於賀年盃係編俾一班馬參賽嘅錦標賽，馬房當時嘅高班馬中，只接收咗一匹「誰可拼」，但經已係八歲老馬，入羅富全馬房前，喺上手練馬師方嘉柏馬經已用得差唔多，不過，羅富全接受咗呢個考驗，以一匹八歲馬贏「旌暉」同「喜旺寶」，首季當練馬師就捧走賀年盃。踏入今季，呢位華籍練馬師繼續發放光芒。呢兩個成功嘅練馬師，都有一個特點，就係首季能夠喺賀年盃「起朵」，今屆兩師徒都有惡馬喺呢場賀年盃列陣，一個派「紅衣優駿」角逐，另一個派「魅力知友」（圖10號）上戰場，串一條師徒Q返來並唔出奇，但係呢個賀年盃，數之前嘅二十屆得主練馬師，贏得最多係邊個馬房？咪係蔡約翰囉，當中佔咗五屆，「魅力知友」上場由李實利騎亦可以近，今次由主帥雷神親征，確係具有冠軍相。