■杜振豪發帖鬧爆《壹仔》。fb截圖壹傳媒集團不斷醜化內地以至新來港人士就梗嘅啦，一位嫁咗嚟香港10年嘅38歲女子，去深圳做美容時俾中介氹咗去整容醫院做手術，結果變成大細眼。本來呢單嘢應該鬧嘅係無良嘅醫護，但《壹週刊》喺報道時，就刻意突出受害人係「新移民妻」，而唔少《壹仔》嘅「高質黃絲」紛紛留言話佢抵死。社民連常委、職工盟幹事杜振豪亦頂唔順，出帖話如果偏見行先，就會好容易俾「呢啲媒體」操控咗都唔知。
毀容當「笑料」 借題氹「黃絲」
《壹仔》近日報道，一名2009年從內地嫁來港嘅女子，嚿年底去深圳做美容時，俾中介游說到整容醫院做提眉，但後來個醫生又話佢唔適合做，應該做重瞼修復術，結果就變咗大細眼。
喺報道呢單嘢時，《壹仔》個配圖就大大隻字寫佢係「新移民妻」、「信唔過香港醫學」、「國內十幾億人口，出錯機會比較少」。
配圖將個受害人咁樣標籤法，成班「黃絲」讀者梗係即時上晒腦啦，猛話佢自己攞嚟衰之類。
杜振豪就喺自己fb轉發咗《壹仔》張圖，話係「呃like教學」：「如何將一件慘事變成一單『笑料』？先加個新移民身份，再放大某句傻傻的說話，搞掂。回到正題，『大陸』固然冇保障，但也不要以為香港規管醫學美容好進步。DR案後6年，2018年11月仍有人在尖沙咀打botox打死咗。資料隨便搵就見。」
佢仲標註「來咗十年都係新移民」、「諗清楚先好做《壹週刊》訪問」等句。 ■香港文匯報記者 陳川