周日有三場大賽舉行，兩場係一級賽，不過，講到實力最平均嘅一場大賽，就係香港經典盃，基本上跑得呢場四歲馬次關，有八成馬以上都可以跑打吡大賽，當然仲有幾隻八十分左右嘅馬，要睇埋呢場走勢，如果接近至有機會，不過，如果有九十分喺手嘅馬，入圍應該冇問題，好似蔡約翰隻「傑綵繽紛」咁，贏完後評分上到九十一分，馬房即刻打退堂鼓唔跑呢場，留力打吡先至再撼過。既然大部分四歲馬都視呢場係打吡前哨戰，至於有冇夠資格跑呢場香港經典盃嘅馬，專登唔跑呢場，而走去跑其他賽事呢？答案係有，亦係出自蔡約翰馬房，呢隻就係「夏威夷」，隻馬會唔會係蔡約翰屆時爭打吡嘅秘密武器就真係唔知，但以隻馬目前評分，一早經已攞咗打吡入場券，唔參與呢次香港經典盃，目的只有一個，求易不求難，因為隻馬經已連續贏過兩場千四米，現時評分已達九十三分，肯定夠資格跑打吡。今次香港經典盃，假如隻馬報名嘅話，排出賽先後次序，佢仲喺「傑綵繽紛」之前，但隻馬唔跑呢場千八米，揀番兩出兩捷千四米列陣，所為嘅就係頭馬，並唔係要爭乜嘢大賽，當到咗終極一戰，「夏威夷」點都會出席打吡大賽，至於有冇二千米長力，只有騎練至有答案，但呢個問題，到咗三月份至諗都未遲，睇番今次幕後刻意安排隻馬跑二班千四米，再睇同場唯一對手係「勁無比」，只要正常發揮，論實力「勁無比」仲未達到「夏威夷」嘅級數。