今次賽事戲碼矚目，因為安排咗兩場一級賽及一場四歲馬香經經典盃，部分馬主更重金禮聘外地大師傅來港客串，如莫雅、布文、貝湯美及岳禮華，唔好話睇馬，單睇呢個陣容已夠吸引，三位澳洲大師傅，個個有功架，但點都唔及得莫雅咁搶鏡，呢次又受到蔡約翰班馬主邀請，騎隻「以奇用兵」（圖9號），有冇計相信大家都唔使多諗，肯定蔡約翰會雙龍出海，用雷神「爭分奪秒」及莫雅夾擊潘頓隻馬王「美麗傳承」。其實，有個怪現象，唔知大家有無發覺，近呢幾年蔡約翰都好鍾意用莫雅跑大賽，大家諗吓蔡約翰本身係澳洲人，鄉里亦有唔少好手，例如今次來港嘅布文、岳禮華及貝湯美，偏偏佢就喜歡用呢位英國好手莫雅，好似今屆莫雷拉要騎「旺蝦王」跑香港短途錦標，同場「爭分奪秒」就用莫雅跑，結果表現好過主帥隻「旺蝦王」得季軍。如果講歷史，莫雅早幾季替榮大董隻「西方快車」出爭大賽至跟蔡約翰結緣，呢隻「西方快車」由莫雅跑過兩次，一次第五名，另一次得第十名，雖然成績麻麻，但老蔡識英雄重英雄，後來一直都有用莫雅跑大賽，上季「平海福星」就係配莫雅贏打吡，所以蔡約翰搵莫雅，除非莫雅分唔到身，否則一定會俾面，皆因由蔡神仙訓練出嚟嘅馬，必有番咁上下競爭能力。正如今次一級賽千四米女皇銀禧盃咁，雷神揀咗「爭分奪秒」騎，不過隻「以奇用兵」亦唔可以睇小，尤其跑千四米，隻馬可以用段段快高速跑法制敵，「美麗傳承」又係用靠放呢一招，假如「以奇用兵」同佢鬥燒，漁人係邊個，當然係雷神隻「爭分奪秒」，但假如「美麗承傳」因應形勢，唔同「以奇用兵」鬥放，改留住爆一段，咁樣就有機會俾「以奇用兵」喺莫雅胯下偷雞，所以呢場女皇銀禧紀念盃，蔡約翰有機會捋馬王虎鬚。