今屆打吡大賽正選名單中，發覺「新力必」竟然可搭上尾班車，有部分人戥後備一嘅「快益善」唔抵，「快益善」評分高過「新力必」，季內有兩次入三甲紀錄，相反「新力必」只能取得一席第四名，不過，馬會仍對大摩馬秤先多少，將「新力必」列作正選馬。當然，呢個決定亦無可厚非，原因大家不妨睇睇近五屆打吡嘅冠軍名單，二○一四年係「威爾頓」摩廄、二○一五年係「戰利品」蔡廄、二○一六年「明月千里」摩廄、二○一七年「佳龍駒」摩廄、二○一八年係「平海福星」蔡廄，假如今屆冇大摩馬參與，顯然會非常失色，話晒近五屆打吡，其中有三屆係由摩廄馬贏得。
今屆嘅「新力必」，能否贏到打吡是其次，但一位經常喺盃賽交出好成績嘅練馬師，怎可能連一匹參戰馬都冇，所以「新力必」嘅列陣，係代表賽事有更大嘅變數，使到賽事更加緊張至啱。本來呢一場打吡大賽，應該係三英戰呂布嘅局面，蔡約翰嘅「夏威夷」，上場以非常輕鬆嘅姿態贏千八米，今次被大多數嘅馬迷認定係打吡熱門嘅爭盃主角，但前日馬會發出一個公告，話呢隻馬前腿不良於行，要再進行獸醫檢驗後先至可上陣，只要能夠過得呢一關，大家也不妨當隻馬係正常咁看待，蔡約翰依然有機會與大摩齊名，近六屆每人贏三屆平分春色。
不過，另一支強兵就係羅富全，佢所派出嘅三駒「妙算達人」、「添滿意」（圖前駒）及「達龍駒」，均有染指打吡嘅本錢，不過，呢三駒中最有冠軍相係「添滿意」，布文落足心機，由四歲馬首關經典一哩賽及次關香港經典盃，都係一手一腳摸準狀態及進度，上場千八米非所長，今鋪二千米先至係呢隻馬嘅首本戲，至於「達龍駒」，冇雨威力頓減，「妙算達人」就係輸最後二百米嘅衝刺了。