丁冠豪今季開倉，主力數糊馬全靠五班分子，有人幫他計過數，現時丁仔所取得嘅二十九場頭馬中，有十二場係來自五班，另外十七場至係其他班次，換句說話，呢十七場五班頭馬中，所有嘅都係舊馬主，至於今季開倉立萬，專登買馬支持丁冠豪嘅馬主，就似乎尚未有代表作。當然作為一個成績算係唔錯嘅馬房，又怎會待簿嗰啲專登購入良駒撐佢嘅馬主。「追風者」（圖3號）嘅馬主卞正華，過往曾經養過一匹「破風者」，當時最初係投入呂健威馬房，表現僅屬一般，翌季即轉投苗禮德馬房，跑過三場，當中贏了兩場谷草千二米後因健康問題退役，今季見丁冠豪開倉，又幸運獲中籤購得呢匹「追風者」，於是加盟丁冠豪馬房藉以作為支持。不過到目前為止，「追風者」經已跑咗三場，全係田草千二米，首兩仗配楊明綸無功而回，最近一仗由夏禮賢披甲，亦係落第而回，今次馬房決定安排隻馬增程跑千四米，續交由上次騎過隻馬一次嘅夏禮賢跑，屆時可望收人馬合拍之效。
翻查「追風者」來港前喺澳洲嘅表現，先後跑過三仗取得全勝紀錄，先係初出贏千三米，再出縮程跑千二米一樣順利再捷，到來港前最後一仗，馬房安排隻馬增程千四，最終以四分一馬位贏埋。由「追風者」初出即贏千三米來判斷，即使隻馬亦贏過千二米，但性能基本上可以判斷牠屬一匹中距離馬，所以來港後隻馬所跑嘅三場短途賽，根本並非出擊目標，今次安排跑千四米至係瞄準目標。假如大家夠細心嘅話，喺上場由夏禮賢披甲跑田草千二米前，丁冠豪已曾經替隻馬報過一場千四米，可惜因右前腿不良於行而退出，該場嘅頭馬係「標準猴王」，呢次傷癒復出，馬房恐怕隻馬水準未十足，先至再安排跑短途，仄試其狀態進度，呢仗至跑千四米，相信係出擊嘅時候。