民主黨立法會議員許智峯舊年喺立法會強搶保安局女EO（行政主任）手機，噚日俾法庭裁定「普通襲擊」、「有犯罪或不誠實意圖取用電腦」及「妨礙公職人員執行職務」三項罪名成立。佢冇悔意就係人都知，但估唔到佢噚日仲好威水咁喺facebook貼咗自己喺法庭嘅陳詞出嚟，內容都係鬧政府人員「違法」，自己搶手機係想「改變社會的不公」，認為自己只係「超越一點點的所謂社會規範，去抵擋、去反抗」，仲叫法官要俾佢去參與《逃犯條例》相關嘅會議添。結果大批網民留言鬧爆許智峯掉轉啲嘢嚟講，「犯法就犯法，唔好講得咁冠冕堂皇啦小丑。」 ■香港文匯報記者 甘瑜
許智峯噚日貼咗篇千字文陳詞出嚟，內容要求法官企喺�嘅角度睇件事，又話自己任何公開行動，都係想「改變社會的不公」喎。佢仲話，政府派人「監視」議員係「違法」、「不當干預」，話立法會因為咁而冇尊嚴、唔獨立、監察唔到政府喎。
佢仲形容，自己搶人手機只係「超越一點點的所謂社會規範，去抵擋、去反抗」，但好「遺憾」法庭往往只係話「抗爭者『太過火』」喎。
犯法者反質疑法庭判決
不過，許智峯轉個頭又話自己係有做錯，會「有所承擔」，但轉多個頭又話立法會就嚟要審議《逃犯條例》有關嘅修訂，希望法庭嘅判刑可以畀佢履行立法會職務。咁即係承唔承擔呢？
雖然佢講到振振有詞咁，但大多數網民都好清醒，所以絕大多數留言都係鬧爆佢嘅。「Mok Andy Kolice」概括話︰「成段嘢嘅中心思想就係， 為咗『公義』不擇手段搶人手機『好小事』， 仲有《逃犯條例》在即你唔好諗住判監 ，我坐監即是『政治審訊』。」「Tommy Lee」亦得出類似結論︰「其實咁大段野（嘢）只係想講，只要係為左（咗）佢聲稱嘅公義，就可以為所欲為，完全唔受任何法律嘅約束。」
「Joseph Lee」狠批︰「喱（呢）個低B早就要DQ佢哩，專做埋搶手機、（搶）咪、（搶）文件。入咗罪扮可憐博同情話『為正義』。」「Ares Chong」亦鬧︰「你是立法局（會）議員，但你去犯法！如政府有犯法，你地（哋）開晒記招公告天下啦。現在罪成，你還不認罪，不認錯......以你的智慧，你真係無料服務香港市民。」
網民悔當年投錯票撐峯
「Denny Lam」就質問許智峯有咩資格去扮執法者︰「你咁鍾意執法，咁你又唔去做警察？又要話啲警察係『黑警』？ 叫你去立法你又走去叫口號，衝主席台，依（𠵱）家仲犯法！你個人係咪真係咁矛盾呢 ？」「Eva Tam」表示︰「我很後悔當年立法會選舉投了你一票。」
有啲網民就廢（費）事同佢嘥氣，「Chewang Pak」就話︰「恭喜你呀被判入罪。」「Mike MikeGiant」就同佢重溫返公民黨黨魁楊岳橋嘅金句︰「聽楊×橋講，入去坐下，人生會更精彩，喺入面學下乜野（嘢）叫法律，出嚟就會自律一下，人人都話為公義而不守法，社會咪會大亂囉，好似立法會咁，比（俾）你地（哋）搞到無規無矩。」
見佢講到《逃犯條例》修訂，「Jaff Yeung」就話︰「『民主派』咁鍾意犯法，唔怪得要反對《逃犯條例》（修訂）啦。」