楊明綸喺周一下午大約三點鐘左右，專登入容天鵬倉探班，原來係為「非凡才子」（圖前駒）加課踱步，同一時間馬房多安排一匹有賽程廄侶「金元寶馬」由新加坡籍助手踱步，兩駒在地堂拍踱十餘分鐘，「非凡才子」全程在楊明綸胯下走花蹄，馬身非常輕盈，沒有半點疲態，相反「金元寶馬」在新加坡籍助手踱步下，神態就比較平淡，昨日因傷退出了比賽，所以今次倉內手足的焦點全部放晒落「非凡才子」身上，此駒今戰升上二班，兼且首度列陣谷賽，以埋門備戰程序未有放緩，快試及大閘工夫都做足，為這次轉場做足準備，勇態已擺在眼前，近期雷神同潘頓日日掃幾W，其他騎師搵食相當艱難，楊明綸難得有匹好馬在手，必會落足心機發揮此駒，戰意可信。
喜蓮彩星摩廄主力
大摩搵咗余詠詩為其下季副練，其實呢個位大摩經已換過好多人，暫時由鄭昌偉頂住，佢本來在從化替大摩睇檔，但因為大摩與摩太對上手副練工作唔係咁合心意，所以才急急召回鄭昌偉幫手。雖然鄭昌偉受到大摩重用，但佢依然比較喜歡從化嘅生活，所以下季余詠詩接手佢目前職務亦一啲都冇介意。其實，大摩馬房長期有咁出色嘅成績，倉務問題方面，少啲應變能力亦不容易處理得到，余詠詩新季可以話受到新挑戰及考驗。今次夜賽大摩戰馬得到鄭昌偉細心打理下，有幾匹摩廄戰駒的爭勝機會已見不俗。
周一排位朝，大摩吩咐鄭昌偉要留喺馬房親自監督兩匹戰馬換銻甲，呢兩隻馬分別係「扎西德勒」及「喜蓮彩星」，前者配潘頓跑頭場三班二千二百米，後駒則由郭能跑第八場二班千八米，今次呢隻馬雖然並非潘頓騎，但換上近期騎冷馬有不俗成績嘅郭能，再有驚喜不足為奇。至於該匹「扎西德勒」，屬轉入大摩馬房首戰，倉主緊張求表現，所以第一戰即扳到潘頓出馬，決心如何大家都應該可以估到，呢一對大摩馬，一冷一熱，隨時會給大家驚喜。
錶之銳加眼罩變身
仲有隻摩廄參戰馬「錶之銳」要留神，該駒近期下午踱步一定要用副練鄭昌偉親自主持，原來呢隻馬近期加了眼罩操練，馬匹立刻變得文靜，精神也集中很多。上次此駒由梁家俊出戰谷草千二米，雖然未入三甲，但走勢卻不俗，只輸三個半身位俾頭馬「年年旺」得第六名，賽後鞍上人梁家俊建議大摩替這駒加眼罩跑，指出如果臨場情緒集中的話，這駒必有問鼎實力，所以今次「錶之銳」便去頭罩並首次申請戴眼罩上陣，屆時利用這配備隨時由蟲變龍。
金錢炮呂健威督操
呂健威今次戰馬並不少，喺周一最後試跑朝，「蟲草之星」副練李新榮拍助手的「金錢炮」，兩駒均在地堂拍踱十餘分鐘，後再由鞍上人逐隻教閘，倉主則企在欄邊細心觀察，當兩駒操練完畢，倉主便吩咐副練李新榮，要在賽事當日早上先在馬房地堂替牠們踱步熱身，然後才能坐九點半的一班運馬車出市區。據悉，呢兩匹馬近況處於大勇水準，如正頭正路去推算，俱有爭勝的本錢。